ललितपुर, १८ भदौ निषेधाज्ञाको बाबजुद ललितपुरको मच्छिन्द्रनाथको रथ जात्रा शुरु गरिएको छ । लामो समयदेखि रोकिएको जात्रा शुरु भएको हो ।
प्रहरी प्रशासनले जात्रामा रोक लगाउन प्रयास गरेको भएपनि सकेको छैन ।बिहीबार बिहानै देखि पुल्चोकस्थित रथ तान्न सयौंको संख्यामा मानिसहरू उपस्थित रहेका थिए ।
पुल्चोकमा काठमाडौबाट समेत मानिसहरू आएपछि हजारौंको भिड जम्मा भएको थियाे भने त्यसलाई रोक्न प्रहरी प्रशासन सक्षम देखिएन । यतिबेला स्वस्फूर्त भिडले रथलाई पुल्चोक बाट तानेर हिडेकाे हाे ।
मच्छिन्द्रनाथको रथजात्रा लिच्छविकाल देखिको ऐतिहासिक परम्परा मानिन्छ । बर्षा र सहकालका देवता मानिने मच्छिन्द्रनाथ रिसाएमा अनर्थ हुने जनविश्वास रहिआएको छ । दशै अघि रथलाई बुङ्मती पुर्याउनै पर्ने र असोजमा मलमास परेकोले मलमासमा रथ तान्न नहुने हुँदा स्वस्फूर्त रुपमा भक्तजनहरु रथ जात्रामा सहभागी भएका एक सहभागीले भक्तपुर पोस्टलाई बताए । रथलाइ आजै गावहल पुर्याइने बताइएकाे छ ।
अपडेट : यसैबीच जात्रामा सहभागीहरुमाथि प्रहरी हस्तक्षेप भएकाे छ । लाठी र पानीका फाेहरा सहित प्रहरीले रथजात्रा राेक्न प्रयास गरिरहेकाे छ । प्रहरी हस्तक्षेपपछि केही मानिसहरु घाइतेसमेत भएका छन् ।