भक्तपुर, २१ मङ्सिर मध्यरातको समयमा कौशलटार स्थित सडकमा कार दुर्घटना हुँदा एक युवतीको ज्यान गएको छ । भक्तपुरबाट काठमाण्डौ तर्फ जादै गरेको कार प्रबिन पेट्रोल पम्प नजिक राती करिब साढे १२ बजे दुर्घटना हुँदा उनको ज्यान गएको हो ।
ज्यान गुमाउनेमा धुमबराहीकी ३० वर्षिया रिया श्रेष्ठ रहेकी छन् । महानगरीय प्रहरी कार्यालय रानीपोखरी, काठमाण्डौबाट दुर्घटनाको खबर पाएपछि भक्तपुर प्रहरी उद्धारका लागि पुगेको थियो । तर, श्रेष्ठले घटनास्थलमै ज्यान गुमाइसकेकी थिइन् । अचेत अवस्थामा उनलाई उद्धार गरि मध्यपुर अस्पताल पुर्याउदा चिकित्सकले मृत्यु भैसकेको पुष्टि गरेका थिए ।
प्रहरीका अनुसार दुर्घटनाग्रस्त कारका चालक सहित ३ जनाको अवस्था सामान्य छ । बिहान मात्र सम्पर्कमा आएका चालक रन्जित कार्कीका अनुसार अन्यको अवस्था थाहा भएको हो । दुर्घटनापछि चालकसमेत फरार थिए । चालक कार्कीले उक्त दुर्घटनामा परेको बा ८ च. ४७५६ नं को कार उनैले चलाएका जिकिर गरेका छन् । कार्कीका अनुसार अनियन्त्रित भई सडक विचको फलामको रेलिङहरुमा ठक्कर खादा कार दुर्घटना भएको हो । काठमाडौ जान हिडेको कार भक्तपुर आउने लेनमा पल्टिई दुर्घटना भएको अवस्थामा प्रहरीले फेला पारेको डिएसपी दिपक गिरीले जानकारी दिए ।
दुर्घटनामा परेका अन्यको विवरण यस प्रकार छ :
मध्यपुर ठिमी न.पा. १ लोकन्थली बस्ने बर्ष २६ को रञ्जित कार्की (चालक – अवस्था सामान्य) ।
मध्यपुर ठिमी न.पा. ५ राधेराधे बस्ने बर्ष २६ को विजय देउजा (सामान्य चोटपटक) ।
सूर्यविनायक न.पा. ४ गाम्चा बस्ने बर्ष २७ को सुदिप थापा (सामान्य) ।
दुर्घटनाको सम्बन्धमा थप अनुसन्धान भैरहेको महानगरीय प्रहरी परिसर भक्तपुरले जनाएको छ ।