भक्तपुर, २५ मङ्सिरसरकारले सहसचिव मणिराम गेलाललाई सचिवमा बढुवा गरेको छ भने अर्का वरिष्ठ सहसचिव दिनेश कुमार घिमिरेलाई छिमेकी राष्ट्र चीनको व्यापारिक नगर छेन्दुका लागि नेपाली महावाणिज्य दूत नियुक्त गरेको छ । बिहीबार बसेको मन्त्रिपरिषद् बैठकले गेलाललाई सचिवमा बढुवा गरेको हो भने घिमिरेलाई महावाणिज्य दूत नियुक्त गर्ने निर्णय लिएको हो ।
गेलाल शहरी विकास तथा भवन निर्माण विभागको महानिर्देशकका रुपमा कार्यरत छन् भने घिमिरे प्रधानमन्त्री एवं मन्त्रीपरिषदको कार्यालयका सहसचिव हुन् । भक्तपुर घर भएका सहसचिव गेलालको सचिवमा पदोन्नती भएको र घिमिरेले महावाणिज दूतको जिम्मेवारी पाएको बैठकमा सहभागी एक मन्त्रीले पुष्टि गरे । मन्त्रीपरिषदको निर्णय भने सार्वजनिक गरिएको छैन ।
भक्तपुरको चाँगुनारायण नगरपालिका-३, झौखेल निवासी गेलाल इन्जिनियरिङ समूहका तथा सूर्यविनायक नगरपालिका-५ कटुन्जेकाे मनाेरम बस्तीमा बसोबास गर्दै आएका घिमिरे सामान्य प्रशासन समूहका सहसचिव हुन् । भक्तपुरको स्थानीय विकासनिर्माण र समस्या समाधानमा चासो राख्दै आएका गेलाल र घिमिरेलाई नयाँ जिम्मेवारी प्राप्त भएकोमा स्थानीयले खुशी व्यक्त गर्दै सामाजिक संजाल मार्फत सरकारलाई धन्यवाद दिएका छन् भने उनीहरुको सफल कार्यकालको शुभकामना व्यक्त गरिएको छ ।
लोक सेवा आयोगका अध्यक्ष उमेश मैनालीको अध्यक्षतामा मंगलवार बसेको बढुवा सिफारिस समितिको बैठकले ३ वरिष्ठ सह सचिवहरुलाई सचिवका लागि सिफारिस गरेको थियो । मणिराम गेलाल, प्रमिला देवी बज्राचार्य र सुशीलबाबु तिवारीको नाम सिफारिस भएकोमा सरकारले गेलाललाई बढुवा गरेको हो । छेन्दुका लागि नेपाली महावाणिज्य दूतमा भने घिमिरेको एकल नाम मन्त्रीपरिषदमा पेश भएकोले उनी नियुक्त हुने निश्चित प्राय: थियो ।
याे पनि
