भक्तपुर, १० पुस वरिष्ठ वामपन्थी विचारक शशी शेरचन अर्थात स्वनाम साथीको निधन भएको छ । शुक्रबार राती मोडल अस्पतालमा उपचारको क्रममा उनको निधन भएको हो ।
निमोनियाको उपचारका लागि मोडेल अस्पतालमा भर्ना भएका उनको राती करिब ९ बजे निधन भएको पारिवारिक श्रोतले पुष्टि गरेको छ । लामो समयदेखि मृगौला रोगबाट पीडित स्वनाम साथीलाई कोभिड १९ संक्रमण पुष्टि भएता पनि उनको रिपोर्ट नेगेटिभ आइसकेको थियो ।
स्वनाम साथी नेपाली वामपन्थी आन्दोलनमा एक आदर्शवादी विचारक एवं अगुवा अभियन्ता मानिन्छन् । ७० वर्षीय स्वनाम साथी पत्नी किरण गौतमसंग बस्दै आएका थिए । उनका कुनै सन्तान भने छैनन् । पंचायत व्यवस्था विरुद्ध खगेन्द्र संग्रौलासँग मिलेर सर्वहारा कम्युनिस्ट लिगको संस्थापक नेता भएका स्वनाम साथी पछि रूपलाल विश्वकर्माको मजदुर किसान संगठनसँग मिसिएका थिए । त्यसपछि नेकपा एकता केन्द्र मसाल हुँदै उनी माओवादी आन्दोलनमा सहभागी भएका थिए ।