भक्तपुर, २१ पुस भक्तपुर नगरभित्र सञ्चालित सबै विद्यालयहरू माघ १ गतेदेखि पूर्णरुपले सञ्चालन हुने भएका छन् । नगर शिक्षा समितिले कोभिड १९ का कारण बन्द विद्यालय माघ १ बाट पूर्णरुपमा संचालन गर्ने निर्णय गरेको हो ।
भक्तपुर नगर शिक्षा समितिका अध्यक्ष समेत रहेका नगर प्रमुख सुनिल प्रजापतिको अध्यक्षतामा बसेको नगर शिक्षा समितिको बैठकले सो निर्णय गरेको प्रेस संयोजक कीर्तिका प्रजापतिले जनाएकी हुन् ।
यसअघि गत मङ्सिर २३ गते बसेको शिक्षा समितिको बैठकले नगरपालिका भित्र सञ्चालित सामुदायिक तथा संस्थागत विद्यालयहरू पुस १ गतेदेखि कक्षा ८, ९ र १० लाई आलोपालो गरी भौतिक उपस्थितिमा कक्षा सञ्चालन गर्ने अनुमति दिएको थियो । कक्षा ८, ९ र १० लाई आलोपालो गरी भौतिक उपस्थितिमा कक्षा सञ्चालन गर्ने भनिएता पनि कतिपय विद्यालयले अन्य कक्षा समेत संचालन गरिरहेका थिए ।
माघ १ बाट भने विद्यालय तहका सबै कक्षाहरु (बालविकास कक्षा देखि १२ सम्म नै) संचालन गर्न पाउने निर्णय भएको बताइएको छ । तर,संचालन अघि अभिभावकहरूको पूर्व स्वीकृति, व्यवस्थापन समितिको निर्णय र पूर्व तयारी तथा कार्ययोजना अनिवार्य गरिएकाे छ । अभिभावकहरूको पूर्व स्वीकृति, व्यवस्थापन समितिको निर्णय र पूर्व तयारी तथा कार्ययोजना बनाई बालविकासदेखि कक्षा १२ सम्मका कक्षाहरू माघ १ गतेदेखि सञ्चालन गर्न/गराउन विद्यालयहरूलाई पत्राचार गर्ने निर्णय भएको नगरपालिकाले जनाएको हाे ।
विद्यालय सञ्चालनको क्रममा विद्यार्थी तथा शिक्षक-कर्मचारीहरूमा कोभिड १९ सम्बन्धी कुनै समस्या देखिएमा आवश्यकताअनुसार विद्यालय पूरै वा आंशिक बन्द गर्न नगर शिक्षा शाखाबाट निर्देशन दिन सकिने समेत निर्णय भएको बताइएको छ ।