इन्टरनेट सेवा प्रदायक भायाेनेट कम्युनिकेसन प्राइभेट लिमिटेडको विद्युतीय संयन्त्रमा अनाधिकृत पहुँच राखेको अभियोगमा एक किसोर पक्राउ परेका छन् । रुपन्देही तिलोत्तमा नगरपालिका-१ बस्ने करिब १८ वर्षीय किसाेरलाई प्रहरीले पक्राउ गरेको हो ।

ग्राहकहरुको तथ्याङकमा अनाधिकृत रुपमा पहुँच पुर्‍याई फेसबुक, इन्स्ट्राग्राम, ट्वीटर लगायतका सामाजिक संजालमा स्क्रिप्ट सार्वजनिक गरेको भन्ने सूचनाको आधारमा प्रहरी प्रधान कार्यालय साइबर व्यूरो भोटाहिटीबाट खटिएको प्रहरीले जिल्ला प्रहरी कार्यालय रुपन्देही र ईलाका प्रहरी कार्यालय बुटवलको सहयोगमा ती किशोरलाई बुटवलबाट पक्राउ गरेको बताइएको छ । प्रहरीले उनको नाम सार्वजनिक गरेको छैन ।

ती किसाेरले उक्त प्राइभेट लिमिटेडको विद्युतीय संयन्त्रमा अनाधिकृत रुपमा पहुँच राखी डाटा व्रिच गरी ‘नरपिचास’ नामको ट्वीटर ह्याण्डल लगायतका सामाजिक संजालको माध्यमबाट स्क्रिप्ट सार्वजनिक गरी विद्युतीय (ईलेक्ट्रोनिक) कारोवार ऐन बमोजिम कसूर गरेको खुल्न आएको र उनी उपर थप अनुसन्धान भइरहेको साइबर व्यूरोले जनाएको छ ।