जनयुद्ध दिवसले जनयुद्धका नेताहरु पुष्पकमल दाहाल प्रचण्ड र डा बाबुराम भट्टराईलाई एकैठाउँ ल्याइदिएको छ । जनयुद्ध दिवसको अवसर पारेर शनिवार काठमाडौंमा आयोजित ‘गुमनाम आमाहरुको कथा’ पुस्तक विमोचन समारोहमा उनीहरु एकसाथ देखिएका हुन् ।

जनता समाजवादी पार्टी (जसपा) का संघीय परिषद् अध्यक्ष डा बाबुराम भट्टराईको पुस्तक ‘गुमनाम आमाहरुको कथा’ बिमोचन कार्यक्रमले लामो समयपछि पुष्पकमल दाहाल प्रचण्ड र बाबुराम भट्टराईलाई एउटै मञ्चमा भेट गराएको हो । सो पुस्तक विमोचन समारोहमा प्रचण्ड एक वक्ता रहेका थिए ।

प्रचण्डसहित सो समारोहमा नेपाली कांग्रेसका वरिष्ठ नेता रामचन्द्र पौडेल, जसपा वरिष्ठ नेता अशोक राईलगायतको समेत उपस्थिति थियो ।

समारोहमा प्रचण्डले बाबुरामसँग एउटै पार्टीमा नरहे पनि राजनीतिक मुद्दा र एजेण्डामा आफूहरू एकै ठाउँमा रहेको बताएका छन् ।

प्रचण्डले भने, ‘हामीलाई इतिहासले अलग हुन दिँदैन । ती हजारौं सहिदले हामीलाई अलग हुन दिँदैनन् ।’ चुम्बकले खिचेजस्तै आफूहरुलाई एक अर्कालाई आपसमा खिचिरहने उनको भनाई छ । उनले बाबुरामसँग २५ वर्ष लामो सहयात्रा रहेको बताउदै समयले फेरि सहकार्यको आवश्यकता औल्याएका छन् ।

लामो बलिदानीपछि प्राप्त उपलब्धिमाथि हमला भएको भन्दै उनले प्रधानमन्त्री केपी ओलीको प्रतिक्रान्ति बिरुद्ध अब सबै एक भएर लाग्नुको बिकल्प नभएको बताए ।