भक्तपुरमा कपडा धुने वासिंग मेसिनमा परी एक महिलाको ज्यान गएको छ । वासिङ मेसिनमा राख्ने केमिकल बनाउने क्रममा वासिङ मेसिन भित्र घुम्ने फलामको रडमा परी आइतवार उनको ज्यान गएको प्रहरीले जनाएको हो ।

ज्यान गुमाउनेमा सूर्यविनायक नगरपालिका वडा नं. ५ चुनदेवी अस्थायी ठेगाना भएकी दोलखाको भिमेश्वर नगरपालिका वडा नं. ९ लाकुरीडाँडाकी कमला के.सी. हुन् । चुनदेवीस्थित लाईभ स्टार कपडा वासिङ सेन्टरमा काम गर्ने उनी वासिङ मेसिनमा राख्ने केमिकल बनाउने क्रममा वासिङ मेसिन भित्र घुम्ने फलामको रडमा अचानक पर्न जाँदा घाईते भएकी बताइएको छ । अचेत अवस्थामा लडिरहेको देखेपछि कम्पनीका संचालक साजन पराजुलीले उनलाई तत्काल उपचारको लागी मध्यपुर अस्पताल पुर्याएको बयान दिएका छन् ।

अस्पताल पुग्नु अघि नै केसीले ज्यान गुमाइसकेको सम्बन्धित चिकित्सकले पुष्टि गरेका छन् । अस्पताल गई बुझ्दा गम्भिर घाइते कमला के.सी. अस्पताल पुर्याउदा नै मृत्यु भएको भन्ने सम्बन्धित चिकित्सकले जानकारी दिएको महानगरीय प्रहरी बृत्त जगातीले जनाएको हो । वृत्त प्रमुख रहेका डिएसपी राजेश थापाको कमाण्डमा अनुसन्धान अधिकृत सहितको प्रहरी टोली घटनास्थल पुगी प्रारम्भिक अनुसन्धान गरेको छ । घटना सम्बन्धमा थप अनुसन्धान भईरहेको प्रहरीको भनाइ छ ।