भक्तपुर, ३ फागुन नेपाल पत्रकार महासंघ उपत्यका प्रदेश कमिटीको साधारण सभा सम्पन्न भएको छ । काठमाडौंमा शनिवार सम्पन्न साधारण सभामा उपत्यकाको तीन जिल्लाका सस्थापक सभापतिहरु सम्मानित समेत भएका छन् ।
नेपाल पत्रकार महासंघ भक्तपुरका सस्थापक सभापति रमेश खड्का सहित काठमाडौंका सस्थापक सभापति किशोर नेपाल र ललितपुरका परशुराम बस्नेत सम्मानित भएका हुन् । त्यसैगरी उक्त अवसरमा २ वर्ष अघि सवारी दुर्घटनामा दिवंगत भएका काठमाडौंका पत्रकार गोविन्द घिमिरेको सन्ततीको शिक्षाका लागि आर्थिक सहयोग गरिनुका साथै कोरोना बीमावापतको रकम पत्रकारहरुलाई हस्तान्तरण गरिएको थियो ।
राजनीतिक व्यक्तिलाई नभई पत्रकारिताकै विशिष्ट योगदान गरेका व्यक्तिहरुको आतिथ्यतामा सम्पन्न साधारण सभामा अग्रजहरुलाई सम्मान गर्ने परम्पराको थालनी र पत्रकारलाई केन्द्रमा राखेर गरिएको कार्यक्रमका कारण सभापति एनके दाहाल र उनको कार्यसमितिको सहभागीहरुले प्रसंशा गरेका थिए ।
साधारण सभामा प्रस्तुत भएका सबै प्रकारका प्रतिवेदनहरु बहुमतले पारित भएका उपत्यका प्रदेश कमिटी सदस्य एवं भक्तपुर अध्यक्ष पुष्करराज बुढाथोकीले बताए ।