भक्तपुर, २५ फागुनमंगलवार बिहान भक्तपुरमा भेटिएको शव सनाखत हुन सकेको छैन । बिहान करिब ७:३० बजेको समयमा फेला परेको शव दिउसो १ बजेसम्म सनाखत हुन नसकेको हो ।
भक्तपुर नगरपालिका वडा नं. २ स्थित वर्खेपाटीभित्र एक व्यक्ति मफलर (गम्छा) को पासो लगाई झुण्डिएको अवस्थामा फेला परेपनि पहिचान खुल्न नसकेको महानगरीय प्रहरी परिसर भक्तपुरका डिएसपी दिपक गिरीले जानकारी दिए ।
मृतक गहुँ गोरो बर्ण, पातलो शरिर, बाँया हातको चोरी औलाको फेदमा A लेखेको ट्याटु खोपेको, फ्रेन्च कट दाह्री काटेको, क्षेत्री बाहुन जस्तो देखिने अन्दाजी ३० बर्षको पुरुष व्यक्ति भएको डिएसपी गिरीले जनाएका छन् । शव पोस्ट मार्टमका लागि भक्तपुर अस्पतालमा राखिएको बताइएकाे छ ।
साथै, माथि उल्लेखित हुलिया भएको मृतकको आफन्तजनहरु हाल सम्म पनि सम्पर्कमा नआएकोले कोही कसैले चिन्नु भएमा तुरुन्त महानगरीय प्रहरी परिसर भक्तपुरको मोवाइल नं. ९८५१२८३०२०, फोन नं. ०१-६६१४७०८ मा सम्पर्क गरी प्रहरी अनुसन्धान कार्यमा सहयोग गरिदिन समेत अपिल गरिएको छ ।