भक्तपुर, २९ फागुन २०७७भक्तपुर नगरपालिकाको आयोजनामा सञ्चालित अन्तर नगर बुद्धिचाल प्रतियोगिताको उद्घाटन संगै शनिवार केहि खेलहरु शुरु भएका छन् । पहिलो दिन भक्तपुरको जगातिस्थित महेश्वरी बैंक्वेटमा संचालित पहिलो राउण्डको खेलमा काठमाण्डौं र ललितपुर महानगरपालिका त्यसैगरी दोलखाको भिमेश्वर र झापाको दमक नगरपालिकाले विजयी शुरुवात गरेका छन् । भक्तपुरको सूर्यविनायक नगरपालिकाले भने पहिलो दिनमै हार व्यहोर्नु परेको छ ।
स्वीस लिग ७ राउण्डको खेल हुने प्रतियोगितामा दोलखाको भिमेश्वर नपाले भक्तपुरको सूर्यविनायक नपालाई ३—१ ले हराएको हो । त्यसैगरी दमक नपाले बनेपा नपालाई ४—० ले हराएका थिए ।
प्रतियोगितामा ललितपुरका सजिन महर्जन, बद्रिलाल नेपाली, विलमलाल श्रेष्ठ र सुरोज महर्जनको टीमले सुपको गोदावरी नपालाई ४—० ले पराजित गरे । काठमाण्डौंले तारकेश्वर नपालाई साढे तीनका विरुद्ध आधा अंकले हराए । काठमाण्डौका लागि केशव श्रेष्ठ, नबिन तण्डुकार र राजेन्द्र बज्राचार्यले जीतेका थिए भने रिजेन्द्र राजभण्डारीलाई १२ बर्षिय पुरुषोत्तम सिलवालले बराबरीमा रोके । यस्तै गोकर्णेश्वर नपाले पोखरा मनपालाई ३—१ ले हराउन सफल भए । गोकर्णेश्वरका पुन्यमान कर्माचार्य, जनार्दन श्रेष्ठ, भगवती शर्माले जिते भने राजभक्त कछेपति पोखराका रामबहादुर क्षेत्रीसित हारे ।
४ दिन सम्म चल्ने यस प्रतियोगितामा देशभरबाट २२ वटा नगरपालिकाहरु सहभागी रहेका छन् ।
