भक्तपुर, ६ चैत २०७७भक्तपुरको प्रमुख आकर्षण विस्का जात्राका लागि भैरवनाथको रथको काम सुरु भइरहेको छ । भक्तपुर नगरको टौमढीस्थित भैरवनाथको रथ निर्माणको कार्य भइरहेको हो ।
हाल रथकोलागि बेतसिं र कांसि बनाउने काम भइरहेको छ । रथको अगाडि सवार हुने बेताल देवता विराजमान हुने काठलाई बेतासिं भनिन्छ । उक्त बेतसिं गत बर्ष नै बनाउने कार्य भएको थियो तर गतवर्ष विस्का जात्रा रोकिंदा उक्त कार्य रोकिएको हो ।
गतबर्ष कोरोना भाइरस संक्रमण नियन्त्रण तथा व्यवस्थापन गर्न भनी विस्का जात्रा औपचारिकतामा सीमित गरिएको थियो ।
त्यसै कारण भैवरनाथको रथ निर्माणको कार्य विचैमा रोकिएको हो ।
भक्तपुरमा मनाइने विस्का जात्रा भने आठ दिन नौ रात सम्म मनाइन्छ । जात्राको मुख्य आकर्षण भनेको काठैकाठले बनेको तीन तले भैरवनाथको रथ एक आपसमा तान्नु हो । उक्त रथ काष्ठकलाको एउटा उत्कृष्ट नमुना पनि मानिन्छ । काठबाट बनेका पांग्रामाथि उक्त रथलाई अगाडि पछाडि गरि आठ बटा मोटा-मोटा डोरीले तानेर गन्तव्य सम्म पुर्याउनु विस्का जात्राको मुख्य आकर्षण हो ।
यो बर्ष आउँदो चैत्रको २८ गतेदेखि विस्का जात्रा सुरु हुनेछ । यो बर्ष रथको छानामा राखिने पाता ,पांग्रा तथा बेतर्सि र रथका बुट्टेदार टुँडार , झालका चौकोसमेत नयाँ बनाइएका छन् ।