२०७७ चैत्र ८ गते,आइतबारनेपाल विश्वमा खुसी भएका देशहरुको सूचीमा ८७ औँ स्थानमा परेको छ । राष्ट्रसंघीय दिगो विकास परियोजनाले शुक्रबार सार्वजनिक गरेको विश्व खुसी रिपोर्ट (वर्ल्ड ह्याप्पिनेस रिपोर्ट–२०२१) को सूचीमा नेपाल ८७ औं स्थानमा परहेको हो । उक्त अध्ययन अनुसार नेपाल यसपटक दक्षिण एसियाकै खुसी मुलुक बन्न सफल भएको हो । नेपालको छिमेकी मुलुक भारत १३९ औँ स्थानमा, चीन ८४ औँ स्थानमा छ, पाकिस्तान १०५ औँ स्थानमा र बंगलादेश १०१ औँ स्थानमा छन् ।
विगत तीन वर्षमा गरिएको सर्वेक्षणका आधामा खुसी देशहरुको सूची निकालिएको हो। स्वस्थकर औसत आयु, सामाजिक सुरक्षा, सामाजिक स्वतन्त्रता र भ्रष्टाचारको अवस्थालाई अध्ययनको सूचक मानिएको छ। अध्ययनले विशेष गरेर कोरोना महामारीले जनजीविकालाई पारेको असरमा जोड दिएको थियो।
सन् २०२० मा ९२ औँ स्थानमा रहेको नेपाल सन् २०२१ मा ५ स्थान माथि उक्लिएर ८७ औँ स्थानमा पुग्न सफल भएको छ । नेपालले १० मा ५.२६९ अंक प्राप्त गरेको छ । त्यसअघि सन् २०१९ मा नेपाल १०० औँ स्थानमा थियो।
सूचीअनुसार विश्वकै सबैभन्दा खुसी मुलुक फिनल्यान्ड पहिलो नम्बरमा छ। फिनल्यान्डपछि क्रमशः डेनमार्क, स्वीटजरल्यान्ड, आइसल्यान्ड, नेदरल्यान्ड्स, नर्वे, स्वीडेन, लक्जेम्बर्ग, न्यूजिल्यान्ड र अष्ट्रिया छन्। उत्कृष्ट दशभित्र युरोपबाहिरबाट न्यूजिल्यान्ड मात्र अटाएको छ।
अफनिस्थान १४९ औँ स्थानमा परेको छ। सूचीमा विश्वको शक्तिशाली राष्ट्र मानिने अमेरिका १९ औँ स्थानमा छ ।
यस्तो छ वर्ल्ड ह्याप्पिनेस रिपोर्ट–२०२१