भक्तपुर, २० चैत नेपाल पत्रकार महासंघको उपत्यका प्रदेश कमिटीको निर्वाचनमा उम्मेदवारी दिएकी भक्तपुरकी पत्रकार लक्ष्मी गारु निर्विरोध निर्वाचित भएकी छन् । उपत्यका प्रदेश कमिटीको महिला सदस्य पदमा उनी निर्विरोध निर्वाचित भएकी हुन् ।
शुक्रवार निर्वाचन समितिले उनी निर्विरोध निर्वाचित भएको सार्वजनिक गरेको हो । उनका प्रतिस्पर्धीहरुको योग्यता नपुगेका कारण उनीहरुको उम्मेदवारी रद्द भएको र गारु निर्विरोध निर्वाचित भएकी उपत्यका प्रदेशका निवर्तमान अध्यक्ष एनके दाहालले बताए ।
भक्तपुरमा रहेर पत्रकारितामा कृयाशील गारु रासस, न्युजअफ साप्ताहिक र थाहा खबरसंग आवद्ध रहेकी छन् । प्रदेशमा अध्यक्ष श्रीजन झा प्यानलबाट उम्मेदवारी दिएकी नेपाल प्रेस युनियनकी उनी यस अघि पनि कार्यसमिति सदस्य रहिसकेकी छन् । सोही पदमा झा प्यानलकै क्रान्तिकारी पत्रकार संगठन आवद्ध सञ्चारकेन्द्रकी कार्यकारी सम्पादक दीया चन्द समेत निर्विरोध निर्वाचित भएकी छन् भने मधेसी सदस्री तर्फका अनिलकुमार गुप्ता र विनयकुमार महतो पनि निर्विरोध निर्वाचित भएका बताइएको छ ।
पत्रकार महासंघ उपत्यका प्रदेशमा झा प्यानलकै प्रेस संगठनको तर्फबाट उम्मेदवार रहेकी देखापढीमा कार्यरत पत्रकार रोजिना थापा पनि महिला उपाध्यक्षमा निर्विरोध निर्वाचित भएकी छन् । उनको प्रतिस्पर्धी रहेकी भक्तपुरकी पत्रकार राससकर्मी चन्द्रकला क्षेत्री (भगवती)ले आफ्नो उम्मेदवारी फिर्ता लिएपछि रोजिना निर्विरोध निर्वाचित भएकी निर्वाचन समितिले पुष्टि गरेको छ ।
पत्रकार महासंघको केन्द्र, प्रदेश र जिल्लाको निर्वाचन भने २५ चैतका लागि तय गरिएको छ ।