भक्तपुरका २ अग्रज पत्रकारले नेपाल पत्रकार महासंघ उपत्यका प्रदेश कमिटीको निर्वाचनमा सानदार जीत हासिल गरेका छन् । पत्रकार अमर भुजू र रत्नकृष्ण श्रेष्ठले सानदार जीत हासिल गरेका हुन् ।

उपत्यका प्रदेश कमिटीका लागि सचिव (समावेशी) का उम्मेदवार अमर भुजू र सदस्य(आदिवासी जनजाति)का उम्मेदवार रत्नकृष्ण श्रेष्ठले आफ्ना प्रतिस्पर्धीलाई भारि मतान्तरले पराजित गर्न सफल भएका छन् । बुधवार सम्पन्न निर्वाचनमा भक्तपुरमा खसेको १७४ मतमा सबैभन्दा बढी १४५ मत भुजूले पाएका थिए भने श्रेष्ठले दोश्रो सर्वाधिक मत १३५ मत प्राप्त गरी आफ्नो लोकप्रियता प्रमाणित गरेका थिए । बिहिवार सम्पन्न मतगणनामा उनीहरु दुवै काठमाडौं र ललितपुरमा पनि लिड गर्दै बिजयी बन्न सफल भएका उपत्यका प्रदेशका पत्रकार नेता नवराज दाहालले जानकारी दिए ।

भुजू दबाब साप्ताहिकका प्रकाशक सम्पादक हुन् भने श्रेष्ठ राससका फोटो पत्रकार हुन् । उनीहरु दुवैले २ दशक बढी समय पत्रकारितामा बिताएका छन् । भुजू नेपाल प्रेस युनियन आवद्ध र श्रेष्ठ प्रेस संगठन नेपालका सदस्य भएपनि भक्तपुरका उनीहरु सबै पत्रकारका साझा र रुचाइएका अनुहार हुन् । उनीहरु दुवैले केन्द्रमा बिपुल पोख्रेल र प्रदेशमा श्रीजन झा नेतृत्वको प्यानलबाट बिजय हासिल गरेका छन् । करिब ९ सय मतका साथ् उनीहरु प्रदेश कमिटीमा बिजयी बनेका हुन् । प्रदेशमा झा नेतृत्वको पुरै प्यानल नै बिजयी बनेको बताइएको छ ।