भक्तपुर, ५ बैशाखनेपाल पत्रकार महासंघको २६औं महाधिबेशनबाट निर्वाचित नयाँ कार्यसमितिलाई पदभार हस्तान्तरण गरिएको छ । आइतवार संचारग्रामस्थित महासंघको कार्यालयमा एक विशेष समारोहका बीच पदभार हस्तान्तरण कार्यक्रम सम्पन्न गरिएको हो ।
समारोहका प्रमुख अतिथिको रुपमा सभामुख अग्निप्रसाद सापकोटा उपस्थित रहेका थिए । उक्त अवसरमा सभामुख सापकोटाले देश कठिन मोडमा रहेको भन्दै यो बेला पत्रकारहरुको महत्वपूर्ण भूमिका रहनुपर्नेमा जोड दिएका छन् । महासंघले पूर्ण लोकतन्त्रको अभ्यास गरेको भन्दै उनले लोकतन्त्रको रक्षा र यसकालागि भएका हरेक आन्दोलनमा महासंघले प्रमुख भूमिका निर्वाह गर्नुपर्ने बताए । सभामुख सापकोटाले नेपाल पत्रकार महासंघका नवनिर्वाचित पदाधिकारी र सदस्यहरुलाई कार्यसफलताको शुभकामना समेत दिए ।
कार्यक्रममा नेपाल पत्रकार महासंघका नवनिर्वाचित अध्यक्ष विपुल पोख्रेलले नेपाल पत्रकार महासंघ प्रेस तथा अभिव्यक्ति स्वतन्त्रताका लागि स्थापित संस्था रहेको भन्दै लोकतन्त्र, प्रेस स्वतन्त्रता नागरिक अधिकार र श्रमजीवी पत्रकारको हकहितका लागि प्रतिवद्ध रहने उद्घोष गरे । उनले नवनिर्वाचित केन्द्रीय सदस्य बबिन शर्मालाई प्रहरीले धरपकड गरेको भन्दै प्रकाशित समाचारबारे छानविन गर्ने संस्था नेपाल प्रहरी नभई प्रेस काउन्सिल रहेको स्पष्ट पारे ।
निवर्तमान अध्यक्ष गोविन्द आचार्यले नेपाल पत्रकार महासंघको इतिहासमा हरेक कार्यसमितिको भूमिका महत्वपूर्ण रहेको भन्दै आफ्नो कार्यकालबाट महासंघको नेतृत्व चयन प्रत्यक्ष निर्वाचन प्रणालीबाट हुने अभ्यास सुरु गरिएको बताए । उनले महासंघलाई थप समावेशी बनाउने अवसर प्राप्त भएको पनि प्रष्ट पारे ।
कार्यक्रममा पूर्व सभापतिहरु डा.सुरेश आचार्य, तारानाथ दाहाल, धर्मेन्द्र झा, पूर्व अध्यक्षहरु शिव गाँउले र डा.महेन्द्र विष्टले शुभकामना मन्तव्य राखेका थिए ।
यो पनि
पत्रकार महासंघमा पोख्रेल नेतृत्वको प्यानल निर्वाचित, भक्तपुरका किलम्बू भए केन्द्रीय सचिव