भक्तपुर, २५ बैशाखपूर्व उद्योगमन्त्रीसमेत रहेका भक्तपुरको निर्वाचन क्षेत्र नम्बर २ बाट निर्वाचित प्रतिनिधिसभाका सांसद महेश बस्नेतलाई कोरोना भाइरस संक्रमण पुष्टि भएको छ । बिहीबार पिसिआर संकलन गराएका सांसद बस्नेतमा कोरोना भाइरस संक्रमण पुष्टि भएको हो ।
सांसद बस्नेतका स्वकीय सचिव दिनेश थापाले पिसिआर रिपोर्ट पोजेटिभ आएको बताएका छन् । संसद सचिवालयले सबै सांसदहरु, स्वकीय सचिव, कर्मचारी र संसदीय मामला हेर्ने पत्रकारहरुको समेत अनिवार्य पिसिआर परिक्षण गराउदा सांसद बस्नेतको रिपोर्टमा कोरोना पोजेटिभ पाइएको हो । स्वकीय सचिव थापाको भने पिसिआर रिपोर्टमा कोरोना नेगेटिभ आएको छ । सांसद बस्नेतमा पनि संक्रमणको कुनै पनि लक्षण नदेखिएको स्वकीय सचिव थापाले जनाएका छन् ।
उनको स्वास्थ्य अवस्था सामान्य रहेको बताइएको छ । बस्नेतले कोरोना विरुद्धको खोपको दुवै डोज लगाएका थिए । सांसद बस्नेत अहिले होम आइसोलेसनमा रहेका छन् ।
अपडेट : सांसद बस्नेत सोमबार कोरोना मुक्त भएको उनका स्वकीय सचिव दिनेश थापाले जानकारी दिएका छन् । संक्रमित पुष्टि भएको पाँच दिनमै सांसद बस्नेतले कोरोना भाइरसमाथि विजय प्राप्त गरेको उनले बताए ।