जनता समाजवादी पार्टी (जसपा) का केहि सांसदहरु भक्तपुरको एक रिसोर्टमा ल्याइएका छन् । अध्यक्ष महन्थ ठाकुर र राजेन्द्र महतोले आफ्नो पक्षका भनिएका सांसदहरुलाई भक्तपुरको एक रिसोर्टमा ल्याएर राखेका हुन् ।

श्रोतका अनुसार उनीहरुलाई डोलेश्वरजाने बाटोमा रहेको डोलेश्वर भिलेज रिसोर्टमा राखिएको छ । भक्तपुर रिसोर्टबाट उनीहरुलाई त्यहाँ पुर्याइएको श्रोतको दावी छ । प्रधानमन्त्री केपी शर्मा ओलीले संसदबाट विस्वासको मत प्राप्त नगरेपछि पदमुक्त भएका उनको पद बचाउन सांसदहरुलाई रिसोर्टमा राखिएको आशंका गरिएको छ । राष्ट्रपति विद्यादेवी भण्डारीले बहुमतको सरकार गठनका लागि आज राति ९ बजेसम्मको समय सिमा दिएकी छन् । नयाँ सरकारका लागि बहुमत सांसद पुर्याउन नदिन सांसदहरु रिसोर्टमा थुनिएका आशंका गरिएको छ ।

भक्तपुरका प्रमुख जिल्ला अधिकारी प्रेमप्रसाद भट्टराईले भने सांसदहरु भक्तपुरको रिसोर्टमा भएकोबारे अनभिज्ञता प्रकट गरे । यसबारे आफूलाई कुनै जानकारी वा रिपोर्ट नआएको उनको भनाइ छ । डोलेश्वर भिलेज रिसोर्ट नेकपा एमालेको ओली पक्षका नन्दनाथ मैनाली,किरण थापा लगायतका व्यक्तिहरुद्वारा संचालित रिसोर्ट हो ।भक्तपुरका सरकारी कार्यालयहरुका कार्यक्रम समेत यहाँ बारम्बार हुने गर्दछ ।