भक्तपुर, ३० बैशाख २०७८राष्ट्रपति कार्यालयले प्रधानमन्त्री पदमा नियुक्तिका लागि दाबी पेस गर्न आह्वान भएकोमा उक्त समयासिमा भित्र कसैको पनि दाबी पेस हुन नआएको स्पष्ट पारेको छ । समयसिमा सकिएपछि राष्ट्रपति कार्यालयले एक बिज्ञप्ती जारी गर्दै कसैको पनि दाबी पेस हुन नआएको स्पष्ट पारेको हो ।
‘सम्माननीय राष्ट्रपति श्रीमती विद्यादेवी भण्डारीज्यूबाट नेपालको संविधानको धारा ७६ को उपधारा (२) बमोजिम प्रतिनिधि सभामा प्रतिनिधित्व गर्ने दुई वा दुईभन्दा बढी दलहरूको समर्थनमा बहुमत प्राप्त गर्न सक्ने प्रतिनिधि सभाका सदस्यलाई मिति २०७८/१/३० गते बिहीबारका दिन साँझको ९:०० बजेभित्र नेपालको प्रधानमन्त्री पदमा नियुक्ति गर्ने प्रयोजनको लागि आफ्नो दाबी पेस गर्न आह्वान भएकोमा उक्त समयावधिभित्र कसैको पनि दाबी पेस हुन नआएको ब्यहोरा अनुरोध छ ।’ प्रवक्ता रुपनारायण भट्टराईद्वारा जारी बिज्ञप्तीमा उल्लेख छ ।
माधव नेपाल समूहले सामुहिक राजीनामा नगरेको र जसपाको महन्थ ठाकुर पक्षका सांसदहरुलाई भक्तपुरको रिसोर्टमा राखिएपछि नेपाली काँग्रेसका सभापति शेरबहादुर देउवाको पक्षमा बहुमत नजुटेको र उनले आफ्नो दावी पेश नगरेका हुन् ।
विपक्षीले बहुमत जुटाउन नसकेपछि राष्ट्रपतिले अब संविधानको धारा ७६ (३) अनुसार केपी ओलीलाई प्रधानमन्त्री बनाउने बाटो खुलेको छ। दुई वा दुईभन्दा बढी दलहरुले बहुमत सिद्ध गर्न नसके ठूलो दलको नेतालाई प्रधानमन्त्री बनाइने संविधानको धारा ७६ (३) मा प्रावधान छ।