भक्तपुर, २ जेठभक्तपुरको चागुँनारायण नगरपालिका वडा नं ६ स्थित वालवन वालखोलामा शनिबार फेला परेको शवको पहिचान खुल्न सकेको छैन् । अन्दाजी ३० वर्षको पुरुष घोप्टो परी अनुहार पानीमा डुबीरहेको अवस्थामा मृत शव फेला परेको थियो ।
महानगरीय प्रहरी परिसर, भक्तपुरले हाल सम्म मृतक शव पहिचान हुन नसकेको जनाएको छ । मृतकको हुलिया गहुँगोरो बर्ण, उचाई ५ फिट ८ इन्च, मझौला शरिर भएको, दाहिने हातको बुढी औला र चोरी औलाको बिचमा ॐ लेखिएको ट्याटु, बाँया खुट्टाको पिडौला देखि बाँया खुट्टाको कान्छी औला सम्म पुरानो खत रहेको, छोटो कपाल दाह्री पालेको, अन्दाजी ३० बर्षको पुरुष व्यक्ति भएको प्रहरीको भनाइ छ ।
मृतकको आफन्तजनहरु हाल सम्म पनि सम्पर्कमा नआएकोले कोही कसैले चिन्नु भएमा तुरुन्त महानगरीय प्रहरी परिसर, भक्तपुरको मोवाइल नं ९८५१२८३०२०, फोन नं ०१ ६६१४७०८ मा सम्पर्क गरी प्रहरी अनुसन्धान कार्यमा सहयोग गरिदिनुहुन डिएसपी दिपक गिरीले अनुरोध गरेका छन् ।
मुचुल्का लगायतको प्रारम्भिक अनुसन्धान कार्य गरी मृतक शव पोष्टमार्टमको लागी काठमाण्डौ मेडिकल कलेज, दुवाकोटको शव गृहमा राखिएको बताइएको छ । हत्या, आत्महत्या वा दुर्घतना भन्ने विषयमा प्रहरीले केही खुलाएको छैन ।