भक्तपुर, २० जेठ २०७८प्रेस काउन्सिल नेपालको अध्यक्षमा पत्रकार बालकृष्ण बस्नेत नियुक्त भएका छन् । बिहीबार साँझ बसेको मन्त्रिपरिषद् बैठकले बस्नेतलाई काउन्सिलको अध्यक्ष नियुक्त गरेको हो ।
दोलखा स्थायी घर भएका बस्नेत भक्तपुरको ठिमीमा बसोबास गर्दै आएका छन् । उनी लामो समय कान्तिपुर दैनिकमा आवद्ध थिए भने पछिल्लो समय खुलानेपाल अनलाइन संचालन गर्दै आएका छन् ।
सत्तारुढ नेकपा एमाले निकट प्रेस चौतारीसंग आवद्ध पत्रकार बस्नेत नेपाल टेलिभिजन संचालक समितिको सदस्य समेत हुन् । भर्खरै उनी राष्ट्रिय समाचार समितिको महाप्रवन्धकका लागि पनि सर्ट लिस्टमा परेका थिए । नेपाल पत्रकार महासंघका पूर्वकेन्द्रीय सदस्य बस्नेत हालै सम्पन्न निर्वाचनमा महासचिव पदमा पराजित भएका थिए ।
सरल स्वभाव भएका बस्नेत व्यवसायिक पत्रकार मानिन्छन् । उनको कार्यकालमा प्रेस काउन्सिलले कुशल नेतृत्व प्राप्त गर्ने उनका समकक्षीहरु बिश्वास व्यक्त गर्दछन् ।
सञ्चारमाध्यमको अनुगमन, मूल्याङ्कन गरी मर्यादीत तथा जिम्मेवार बनाउन प्रेस काउन्सिल नेपालको महत्वपूर्ण भूमिका रहेको छ । काउन्सिल अध्यक्षको पदावधी ४ वर्ष रहने गर्दछ ।