नेपाल मजदुर किसान पार्टी(नेमकिपा)का अध्यक्ष एवं वरिष्ठ बामपन्थी नेता नारायणमान बिजुक्छें ‘रोहित’ ले ओली सरकारको आलोचना गरेका छन् । चुरे पहाडको बिनासमा उद्धत रहेको ओली सरकारको उनले आलोचना गरेका हुन् ।

अध्यक्ष बिजुक्छेंले चुरे दोहनमा वर्तमान सरकारले विदेशी स्वार्थ अनुरुप काम गरेको आरोप लगाए । चुरे माथि भारतले पहिल्यैदेखि आँखा गाडिरहेको उनको भनाई छ । शनिवार ‘ङातापोल्हँ जीर्णोद्धार २०७७’ पुस्तक र प्राविधिक प्रतिवेदन अनलाइन बाट सार्वजनिक गर्दै उनले वर्तामान सरकारप्रति असन्तुष्टि जनाएका हुन् । चुरे पहाड नेपालको महत्वपूर्ण प्राकृतिक स्रोत हो, यसको संरक्षण गर्नु आवश्यक छ भन्दै नेता बिजुक्छेँले चुरे दोहनमा पूर्व र वर्तमान सरकारहरु जिम्मेवार रहेको र यसमा विदेशी स्वार्थ रहेको प्रष्ट पारे ।

योग्यता र अनुभव विना मन्त्री बनाउने प्रचलनका कारण देशका मन्त्रालयहरु लथालिंग रहेको र कमिसनको चलखेल व्याप्त रहेको उनले आरोप लगाउदै सरकारमा गएका राजनीतिक पार्टीका कारण देश आर्थिक र राजनीतिक रुपमा झन् पछाडि धकेलिएको दावी समेत गरे ।

कार्यक्रममा पार्टीका केन्द्रीय सचिव प्रेम सुवालले दुईतिहाई बहुमत प्राप्त सरकारले देश र जनताको सेवा गर्न नसेकेको हुँदा निर्वाचनको माध्यमबाट यिनीहरुलाई पराजीत गर्नुपर्ने आवश्यकता औल्याए ।

जन्मको आधारमा नागरिकता दिने अध्यादेश माथि खेद प्रकट गर्दै उनले ओली सरकारले देशको हित बिपरित हुने गरी अध्यादेश ल्याएको जिकिर गरे । जन्मको आधारमा नागरिकता पाएकालाई वंशजको आधारमा नागरिकता दिने अध्यादेश देशको हितविपरीत भएको उनको भनाइ छ ।

काठमाडौं उपत्यका वरपर आधुनिक सहर निर्माण गर्ने भन्दै जथाभावी बस्ती विकास गर्नु पनि गलत भएको बताउदै उनले सरकार सन्तुलित विकास विरोधीको रुपमा अगाडि बढिरहेको बताए ।

उक्त अवसरमा भक्तपुर नगरपालिकाका प्रमुख सुनिल प्रजापतिले ङातापोल्हँ मन्दिर (पाँच तले मन्दिर) सबैको शान भएको बताउदै वर्षको लाखौं पर्यटक लाई यसले आकर्षित गर्ने गरेको स्मरण गरे । उनले मन्दिर जीर्णोद्धारमा नगरपालिकाले कुनै कसर बाँकी नराखेको बताउदै नगरपालिका प्रतिको बिश्वास नै आफूहरुको प्रेरणा बनेको बताए ।

नगरपालिकाले सञ्चालन गरेको ख्वप अस्पताल कोभिड युनिटमा अक्सिजन प्लान्ट निर्माण तथा स्वास्थ्य उपकरणहरु व्यवस्था गर्नको लागि स्वतःस्फूर्त ढंगले आर्थिक सहयोग प्राप्त हुनु नगरपालिकाप्रति जनताको बिश्वास भएको र आफूहरुलाई यसले काममा उत्साह मिलेको प्रमुख प्रजापतिले प्रष्ट पारे ।

कार्यक्रममा नगरपालिकाकी उपप्रमुख रजनी जोशी,विशेष अदालतका पूर्व मुख्य न्यायाधीश गौरीबहादुर कार्की, प्रा.डा. सुदर्शनराज तिवारी,प्रा.डा. प्रेमनाथ मास्के,संस्कृतिविद् प्रा.डा. पुरुषोत्तमलोचन श्रेष्ठलगायतले पनि आफ्नो मन्तब्य प्रस्तुत गरेका थिए ।

कार्यक्रम सञ्चालन वडा नं. ९ का वडाध्यक्ष रविन्द्र ज्याख्वले गरेका थिए भने उपभोक्ता समितिका अध्यक्ष केशव तमखूले मन्दिर जीर्णोद्धारदेखिका कार्यप्रगति प्रतिवेदन प्रस्तुत गरेका थिए ।