भक्तपुर, २५ असार २०७८बिहीवार मात्र बढुवा भएका अतिरिक्त प्रहरी महानिरीक्षक(एआईजी) सहकुल बहादुर थापालाई मानव श्रोत तथा प्रशासन विभागमा पदस्थापन गरिएको छ । मन्त्रिपरिषद्को बैठकले उनको बढुवासंगै उक्त विभागमा पदस्थापन गरेको हो ।
मानवश्रोत हरेक संगठनको पहिलो र आधारभूत श्रोत हो । त्यसमा पनि प्रहरी संगठनमा यसको ज्यादै ठुलो महत्व रहन्छ । नेपाल प्रहरीको मानव श्रोत तथा प्रशासन विभाग प्रमुखको जिम्मेवारी पाउनु एआईजी थापाको लागि महानिरीक्षकको ढोका खुल्नु मानिएको छ । हाल नेपाल प्रहरीका २५ सय भन्दा बढी कार्यालयहरुमा जनशक्ति एवं आर्थिक प्रशासन सुचारु गर्ने, भौतिक पूर्वाधार व्यवस्थापन, बन्दोबस्तीका सामाग्रीहरु नियमानुसार वितरण, आवधिक रुपमा अनुगमन तथा मुल्यांकन समेत उनको नेतृत्वमा मानव श्रोत तथा प्रशासन विभागले गर्नेछ ।
अतिरिक्त प्रहरी महानिरीक्षक(एआइजी)थापा भक्तपुर घर भएका प्रहरी अधिकारी हुन् ।
बिहीबार बसेको मन्त्रिपरिषद् बैठकले सबै एआईजीहरूको सरुवा समेत गरेको छ । स्रोतका अनुसार महानगरीय प्रहरी कार्यालय, रानीपोखरीका प्रमुख हरिबहादुर पाल कार्य विभागमा पठाइएका छन् भने उनको ठाउँमा राष्ट्रिय प्रहरी प्रशिक्षण प्रतिष्ठान बाट सरुवा भै प्रद्युम्न कार्की आएका छन् । कार्की पनि भक्तपुर घर भएका प्रहरी अधिकारी हुन् ।
प्रशासन विभागका नीरजबहादुर शाहीलाई अपराध अनुसन्धान विभागमा आएका छन् भने अपराध अनुसन्धान विभागका एआईजी विश्वराज पोखरेल प्रहरी प्रशिक्षण प्रतिष्ठान पठाइएका छन् ।