भक्तपुर, ४ साउन २०७८बागमती प्रदेशका मुख्यमन्त्री डोरमणि पौडेलले नेमकिपाका अध्यक्ष नारायणमान बिजुक्छेंसंग भेटवार्ता गरेका छन् । भक्तपुर नगरपालिका अवलोकनका लागि आएका मुख्यमन्त्री पौडेलले नेमकिपा अध्यक्ष बिजुक्छेंसंग समेत भेटवार्ता गरेका हुन् ।
भेटको अवसरमा मुख्यमन्त्री पौडेलले नेमकिपाको नेतृत्वमा भक्तपुर नगरपालिकाले शिक्षा र स्वास्थ्य क्षेत्रमा उदाहरणीय प्रगति गरेको प्रतिक्रिया दिएका थिए । प्रदेशबाट भक्तपुरका अन्य अस्पतालहरुमा बजेट पठाएपनि ख्वप अस्पतालमा आफूहरुको ध्यान नपुगेको प्रति दुख व्यक्त गर्दै उनले अब उप्रान्त सक्दो सहयोग गर्ने बचन समेत दिएका थिए ।आफूसँग स्थानीय तहमा लामो समयसम्म काम गरेको अनुभव बताउदै मुख्यमन्त्री पौडेलेले आफू स्थानीय तहलाई पूर्ण स्वायत्तता दिनुपर्ने पक्षमा रहेको पनि प्रष्ट पारे ।
देशको परिवर्तित राजनीतिको विषयमा छलफल गर्दै नेकपा एमालेका नेतासमेत रहेका मुख्यमन्त्री पौडेलले ओली सरकारलाई नेमकिपाको सहयोगको खुलेर प्रशंशा समेत गरे ।
भेटमा अध्यक्ष बुजुक्छेंले स्थानीय तहलाई पूर्ण स्वायत्तता दिनुपर्ने बताएका थिए भने प्रदेश र स्थानीय तहले केन्द्रको मुख नताकी आफ्नै भरमा विकास गर्नुपर्नेमा जोड दिए ।
नयाँ नयाँ स्रोतको खोजी गर्न सुझाव दिंदै उनले भ्रष्टाचार रोक्न सके जनताले सुख पाउँने बिश्वास व्यक्त गरे ।
उक्त अवसरमा नगर प्रमुख सुनिल प्रजापतिले भक्तपुर नगरपालिकाको संक्षिप्त विशेषताहरु प्रस्तुत गर्दी नगरपालिकाले शिक्षा, स्वास्थ्य, सम्पदा संरक्षण, विकास निर्माण, सरसफाईलगायतका क्षेत्रमा गरिरहेका गतिविधि र उपलब्धीबारे जानकारी गराएका थिए ।
भेटवार्तामा प्रदेशका सांसदहरु सुरेन्द्रराज गोसाइँ, सृजना सैंजु, दिपक निरौला र उपमेयर रजनी जोशीको समेत उपस्थिति रहेको थियो ।
भेटअघि मुख्यमन्त्री पौडेलले भक्तपुर नगरकार्यपालिकाको कार्यालय , ख्वप कलेज, ख्वप अस्पताल, ख्वप अस्पताल कोभिड युनिट र ख्वप इन्जिनियरिङ्ग कलेजको अध्ययनभ्रमण गरेका थिए ।