घर, कारखाना तथा बाटोमा फ्यालिएका कार्टुनका टुक्राहरु लगायतका अन्य फोहोरमैला सामान उठाउने भेष बनाई चोरीमा संलग्न ब्यक्ति पक्राउ परेका छन् ।  मध्यपुर थिमिमा खाली ताला लगाईराखेका तथा सुनसान घरहरुबाट मौका छोपी नगद, ल्यापटप, मोबाईल तथा बिभिन्न सुन-चाँदीका गर-गहनाहरु चोरी गर्ने व्यक्ति पक्राउ परेका हुन् ।                                                                                                                               गत जेठमा भक्तपुरको मध्यपुर थिमी न.पा. वडा नं. ०३, लोकन्थली, राममन्दिर, बुढाथोकीगाउँ स्थित नरेन्द्रराज सिजापतीको घरबाट MI Notebook, Nokia मोबाइल सेट थान १, नगद रु. २७,०००।- लगायतका धनमाल समेत रु. १,८५,५००।- बराबरको धनमाल चोरी गरी लाने कार्यमा संलग्न जिल्ला ललितपुर, बालकुमारी बस्ने झोक्की भन्ने कुमार तोलाङ्गेलाई प्रहरीले पक्राउ गरेको हो । अपराध अनुसन्धान महाशाखाबाट खटिएको विशेष टोलीले गत मंगलवार बालकुमारी पुलबाट पक्राउ गरी तोलाङ्गेलाई  थप अनुसन्धान तथा कारवाहीको लागि महानगरीय प्रहरी वृत्त, ठिमी भक्तपुर पठाईएको जनाएको छ।

प्रारम्भिक अनुसन्धानको क्रममा ३० वर्षको झोक्की भन्ने कुमार तोलाङ्गेको स्थायी ठेगाना महोत्तरीको बर्दीवास-८ रातुखोला भएको थाहा भएको छ । उनी बिजुलीको तार चोरी मुद्धामा बि.सं. २०७२ साल असोजमा पक्राउ परी जेल चलान भई २०७५ सालतिर छुटेको भन्ने बुझिएको बताइएको छ ।साथै, अनुसन्धानको क्रममा निम्न विवरण भएका ल्यापटप थान २(दुई) र VIVO मोबाईल थान १ बरामद भएकोमा सो सामानहरुको पीडित नखुलेकोले प्रमाण खुलाउन सक्ने व्यक्तिहरुले कार्यालयमा सम्पर्क राख्न हुन समेत प्रहरीले अनुरोध गरेको छ ।

बरामद सामानको बिबरण:-
१. नोकिया मोबाईल थान १
२. सिरियल नम्बर FQXRB82 भएको Inspiron 3542 मोडलको कालो रङको Dell ल्यापटप थान १
३. 81D1 मोडलको कालो रङको Lenovo ल्यापटप थान १
४. ८६३२९६०४४१४३९१५, ८६३२९६०४४१४३९०७ IMEI नम्बर भएको VIVO मोबाईल थान १