माधव नेपालका भक्तपुर अध्यक्ष रजन केसीले उनको साथ् छोडेका छन् । नेपाल नेतृत्वको नेकपा (एकीकृत समाजवादी) पार्टीमा उनी नबस्ने भएका हुन् ।

नेकपा(एमाले)भित्रको बिबादमा माधव-झलनाथ खनाल पक्षले देशैभर समानान्तर कमिटी बनाउदा भक्तपुर जिल्ला कमिटीका अध्यक्षमा रजन केसी रहेका थिए । एमाले विभाजन भई बनेको नेकपा एकीकृत समाजवादी पार्टीमा भने केसीले नेपालको साथ् दिएनन् । उनले आफू फुटको पक्षमा नरहेको कारण नेपाल नेतृत्वको नयाँ पार्टीमा नरहने पुष्टि गरेका छन् ।

भक्तपुर पोस्टसंग कुरा गर्दै केसीले नेकपा एमालेको तत्कालिन समानान्तर कमिटी पार्टी फुटका लागि नभई आन्तरीक संघर्ष र पार्टीलाई सहि ट्रयाकमा ल्याउनका लागि भएको भन्दै पार्टी विभाजनको पक्षमा आफू उभिन नसक्ने बताए । आफू अध्यक्ष ओली नेतृत्वको नेकपा एमालेमै रहने उनको भनाइ छ । ”म हिजो पनि एमाले थिए र आज पनि छु ।” उनले भने ।

माधव-झलनाथ खनाल पक्षको तत्कालिन समानान्तर कमिटीका सचिव श्यामसुन्दर बस्नेतले भने भक्तपुरको अध्यक्ष रहेका केसीमा बैचारिक बिचलन आएको बताए । अध्यक्ष खुट्टा कमाएर भागेको भन्दै उनले आफूहरु नयाँ पार्टीप्रति पूर्ण बफादार रहेको प्रष्ट पारे । छिट्टै जिल्ला भेला गरी नेतृत्वको विषयमा निर्णय गरिने उनले जनाएका छन् ।