भक्तपुर, १० असोज २०७८भक्तपुरमा नेपाली कांग्रेसको नगर अधिवेशन सम्पन्न भएको छ । जिल्लास्थित चारैवटा नगरपालिकामा नयाँ नेतृत्व चयन गर्दै नगर अधिवेशन सम्पन्न भएको हो ।
भक्तपुरको चारैवटा नगरपालिकामा दुई पक्षले प्यानल पेश गरेपछि आइतवार चुनाव भएको थियो ।
नगर अधिवेशनमा जिल्ला सभापति दुर्लभ थापा पक्षको एक समूह र त्यसको बिरुद्ध नेताहरू गणेशमान चक्रधर, अष्ट कवे, महेश श्रेष्ठ, कविर राणा र विनोद कायष्ठ लगायतको अर्को पक्षको समूह बीच चुनावी भिडन्त भएको थियो ।
चुनावी नतिजा अनुसार भक्तपुरका ४ नगरपालिका मध्ये सभापति थापा पक्षले २ वटा र अर्को पक्षले पनि २ वटामा जीत हासिल गरी बराबरी नतिजा निकालेका छन् । प्रत्येक नगरपालिकामा सभापतिले आफू मात्र नभई प्यानल नै जिताउन सफल भएका छन् ।
सूर्यविनायक नगर सभापतिमा थापा पक्षबाट जिल्ला सचिव रहेका हेभिवेट उम्मेदवार निशान ढुंगेल आफै मैदानमा उत्रेका थिए । अर्को प्यानलबाट नगरको पार्टी उपसभापति रहेका युवा नेता रवी राणाले ढुङेललाई चुनौती दिएका थिए । ढुंगेलले राणा विरुद्ध सहज जीत हासिल गरेका छन् । ११२ बिरुद्ध १४४ मतसहित उनी बिजयी बनेका हुन् । तर, मध्यपुर थिमिमा भने जिल्ला सभापति थापा पक्ष नराम्ररी पराजित भएको छ ।
मध्यपुर थिमिको नगर सभापतिमा वर्तमान सभापति सुरेन्द्र श्रेष्ठलाई हरिदास प्रजापतिले १ सय बढी मतान्तरले पराजित गर्दै निवर्तमान बनाउन सफल भएका छन् । यो नगरपालिकामा सर्वाधिक ४९ मत बदर भएको छ ।
जिल्ला सभापति थापा पक्षले मध्यपुरको हारको बदला चाँगुनारायण नगरपालिकामा १ सय बढी मतान्तरले जीत निकाल्दै बदला चुक्ता गरेको छ । थापा पक्षका नगर सभापतिका उम्मेदवार शिवहरी केसीले गोपाल पौडेललाई १ सय बढी मत अन्तरले हारको स्वाद चखाएका छन् ।
भक्तपुर नगरपालिकामा भने थापा समूहबाट वर्तमान नगर सभापति राम कासुला फेरिपनि सभापतिको उम्मेदवार बनेका थिए ।तर, उनलाई १९ मतले पछि पार्दै राजेन्द्र तमखुले जीत हासिल गरे ।
निर्वाचन क्षेत्र नम्बर २ अन्तर्गत सूर्यविनायकमा सभापति थापा पक्ष र मध्यपुरमा थापा इत्तर पक्षले जीतको नतिजा निकाल्यो भने निर्वाचन क्षेत्र नम्बर १ अन्तर्गत चाँगुनारायणमा सभापति थापा पक्ष र भक्तपुरमा थापा इत्तर पक्षमा चुनावी परिणाम प्राप्त भयो । चुनावी परिणामलाई विश्लेषण गर्दा क्षेत्र र जिल्लाको नेतृत्व चयन अझ पेचिलो बनेको भक्तपुर पोस्टसंग कुराकानी गर्दै भक्तपुरका वरिष्ठ पत्रकार रमेश खड्का बताउँछन् ।