भक्तपुर, १३ साउन २०७८भक्तपुरको मध्यपुर थिमि नगरपालिका ८ बोडेस्थित कमलपोखरीमा डुबेर एक बालकको ज्यान गएको छ । ज्यान गुमाउने बालक खोटाङको जन्तेढुंगा गाउँपालिका घर भई हाल स्थानीय पाटीमा बस्ने रमेश खड्काको ६ वर्षीय छोरा रोसन खड्का हुन् ।
बुधवार दिउँसो करिब २ बाजेको समयमा पोखरीमा बालक डुबेको देखी स्थानीयले उद्धार गरी प्रहरीलाई खबर गरेका थिए । थिमि वृत्तबाट असई राज कुमार दनुवारको कमाण्डमा खटिएको प्रहरी टोलीले बालकलाई उपचारको लागि गठ्ठाघर स्थित नागरिक अस्पताल पर्याएको थियो । उपचारकै क्रममा करिब २:३० बजे बालकको ज्यान गएको प्रहरीले जनाएको छ ।
दुर्घटनाको सम्बन्धमा थिमि वृत्तबाट इन्स्पेक्टर रबिन्द्र खड्काको नेतृत्वमा अनुसन्धान अधिकृत सहितको प्रहरी टोली खटी गई घटनास्थल मुचुल्का तथा प्रारम्भिक अनुसन्धान कार्य गरिएको महानगरीय प्रहरी परिसरका डिएसपी दिपक गिरीले जानकारी दिए । पानीमा डुबेपछि मात्र स्थानीयले देखेको र अन्य कुरा नखुलेको बताइएको छ । घटना सम्बन्धमा थप: अनुसन्धान भईरहेको प्रहरीको भनाइ छ ।