भक्तपुर, १४ असोज भक्तपुर नगरपालिकाले शैक्षिक सत्र २०७८/७९ का लागि कक्षा ११ मा ९८ विद्यार्थीलाई छात्रवृत्ति प्रदान गरेको छ । मापदण्ड अनुसार छनोट भएका ९८ जना विद्यार्थीहरुलाई नगरपालिकाले छात्रवृत्ति प्रदान गरेको हो ।
भक्तपुर नगरपालिका क्षेत्रभित्र सञ्चालित कलेजहरु ख्वप मावि, बागीश्वरी मावि, बासु मावि, श्री पद्म मावि, आदर्शआजाद, शारदा मावि र शारदा क्याम्पसमा कक्षा ११ मा अध्ययनरत विज्ञान विषयका ३५ जना, व्यवस्थापन विषयका ४८ जना, कानुन विषयका ४, शिक्षा विषयका ६ जना र मानविकी विषयका ५ जना गरी ९८ जना विद्यार्थीहरुलाई छात्रवृत्ति प्रदान गरिएको नगरपालिकाले जनाएको छ ।
छात्रवृत्ति छनौट समितिमा अध्यक्ष सुनिल प्रजापति सदस्यहरुमा वडा नम्बर ९ का वडाध्यक्ष रवीन्द्र ज्याख्व,७ का उकेश कवां लगायत रहेका थिए । छात्रवृत्तिमा छनोट भएका विद्यार्थीहरुलाई बिहीवार एक समारोहकाबीच नगर प्रमुख प्रजापतिले छात्रवृत्ति छनोट सिफारिस पत्र प्रदान गरे ।
कार्यक्रममा प्रमुख प्रजापतिले विद्यार्थीको आचरण, व्यवहार र संस्कारले सभ्य समाज निर्माणमा टेवा पुग्ने बताउदै विद्यार्थीहरुमा देश र समाजको निम्ति काम गर्ने भावना हुनुपर्नेमा जोड दिएका थिए ।