भक्तपुरको चाँगुनारायण नगरपालिका वडा नं. ९ ताथली स्थित ठुलोपाखा सामुदायिक बनमा एक मानव कंकाल फेला परेको छ । मंगलवार बिहान करिब पौने ११ बजे उक्त कंकाल फेला पारेको प्रहरीले जानेको छ ।

महानगरीय प्रहरी वृत्त जगातीका प्रहरी निरीक्षक सुर्य बहादुर शाही लगायत बिशेषज्ञ डाक्टरसहितको टोली घटनास्थल पुगी अनुसन्धान अघि बढाएको बताइएको छ ।कंकाल पोष्टमार्टमको लागि के.एम.सि. अस्पताल दुवाकोट भक्तपुर पठाई घटनाको सम्बन्धमा थप अनुसन्धान भई रहेको प्रहरीको भनाइ छ ।

कंकाल संगै रुखको फेदमा H.P. Invent लेखेको कालो रंगको झोला फेला परेको, उक्त झोला भित्र चेक रंगको एउटा सर्ट, प्लाष्टिकमा प्याक गरी राखेको अवस्थामा रुद्धाक्ष, १ जोर अंदाजी ४० नम्बरको खरानी रंगको गोल्ड स्टार जुत्ता, Supreme लेखेको सेतो टिर्सट, Gold Original लेखेको कालो ज्याकेट र खैरो रंगको पाईन्ट रहेको, पाईन्टको दाहिने गोजीमा लाईटर फेला परेको महानगरीय प्रहरी परिसर भक्तपुरका डिएसपी दिपक गिरीले जानकारी दिए ।

उनले उक्त कपडा लगाएको मानिस हराएको भएमा प्रहरी सम्पर्कमा आई अनुसन्धानमा सहयोग गर्न समेत अनुरोध गरेका छन् ।

डिएसपी गिरीले निम्न मोबाइल नम्बरमा सम्पर्क गरी प्रहरी अनुसन्धानमा सहयोग गरिदिन अनुरोध गरेका छन् ।
– महानगरीय प्रहरी परिसर, भक्तपुर (संचार शाखा) – ९८५१२९३१५०, ९८५१२९०९७६
– महानगरीय प्रहरी वृत्त जगातीका डिएसपी राम बहादुर के.सी. ९८५१२८८६३३
– महानगरीय प्रहरी वृत्त जगाती भक्तपुर (डिउटि अधिकृत) – ९८५१२८३०२८