गएराति भक्तपुरको सूर्यविनायक नगरपालिकामा कुटपिटबाट एक युवकको ज्यान गएको छ । ज्यान गुमाउने युवक सूनपा-१ सिरुटारका ३३ वर्षीय राजन श्रेष्ठ रहेका छन् ।

गएराति साढे ९ बजे उनलाई बोलाएर लगेको समुहमाथि परिवारले हत्याको आरोप लगाएको छ । महानगरीय प्रहरी परिसर भक्तपुरका प्रहरी निरीक्षक लोकबहादुर जिसीले दिएको जानकारी अनुसार प्रहरीले श्रेष्ठलाई राति करिब १० बजे सूनपा-२ बालकोटको बसिटोल स्थित हनुमती खोलाको फलामे पुल नजिकै बाटोमुनिबाट उद्धार गरी अस्पताल पुर्याएको थियो । उनलाई मध्यपुर अस्पतालले करिब ११:५० बजे मृत घोषित गरिदिएको उनले जानकारी दिए ।

घटनास्थलमा महानगरीय प्रहरी बृत्त थिमिका प्रहरी प्रमुख रहेका डिएसपी नरहरी रेग्मीको नेतृत्वमा अनुसन्धान अधिकृत सहितको प्रहरी टोली पुगी अनुसन्धान अघि बढाईएको बताइएको छ ।

श्रोतका अनुसार आपसी लेनदेनका कारण उत्पन्न बिबाद मृत्युको कारण बन्न पुगेको छ । मृतक श्रेष्ठमाथि आक्रमणकारीले ह्याम्मर लगायतले प्रहार गर्दा मृत्यु ह्दयबिदारक बनेको बताइएको छ । मृतक श्रेष्ठ बिबाहित रहेका थिए । उनको श्रीमती र अढाई वर्षकी एक छोरी छन् । बस्तीकै बीचमा हत्याका कारण परिवार र आफन्त मात्र नभई स्थानीय समेत आतंकित बनेका देखिन्छन् ।