भक्तपुर, २४ कात्तिक २०७८नेकपा(एमाले) को युवा संगठन राष्ट्रिय युवा संघ नेपालले गत मंगलवार राति बालकोटमा भएको राजन श्रेष्ठको हत्यासम्बन्धी अनुसन्धान प्रभावकारी नभएको आरोप लगाएको छ । प्रहरीले चित्तबुझ्दो अनुसन्धान नगरेको संघले आरोप लगाएको हो ।
बिहीवार मध्यपुर थिमिमा आयोजित दबाब तथा पत्रकार सम्मेलनमा संघका केन्द्रीय अध्यक्ष किरण पौडेलले विभत्स र क्रुर तबरले गरिएको हत्याको अनुसन्धानलाई प्रहरीले औपचारिकता मात्रै दिन खोजेको भन्दै देशभरबाट आन्दोलन चर्काउने चेतावनी समेत दिएका छन् । घटनामा पक्राउ परेका दुई जनालाई सार्वजनिक गरेर घटनालाई औपचारिकता प्रदान गरी प्रहरी पन्छिन नहुनेमा जोड दिदै उनले उक्त चेतावनी दिएका हुन् ।
प्रभावकारी अनुसन्धान गरी तथ्यसम्म पुगेर सत्य तथ्य बाहिर ल्याउन माग गर्दै अध्यक्ष पौडेलेले भने , ”चित्त बुझ्दो अनुसन्धान नभए देशभरबाट आन्दोलन चर्काउछौ ।” उनले घटनास्थल भन्दा केही परको घर कम्पाउण्ड र फलामको रेलिङबारमा देखिएको रगतका बारेमा प्रश्न उठाउँदैं घटनामा संलग्न हत्याराहरु अनुसन्धानको दायरामा नआएका आशंका व्यक्त गरेका छन् ।
कार्यक्रममा राष्ट्रिय युवा संघ नेपाल जिल्ला कमिटी भक्तपुरले प्रेस बक्तब्य मार्फत हत्याको घोर निन्दा र बत्सरना गरेको छ । अध्यक्ष पुष्पराज बस्नेत द्वारा प्रेषित बक्तब्यमा राजधानीको मुटुमै घताइएको यस घटनाले शान्ति सुव्यवस्था र बाच्न पाउने नागरिक हक प्रति राज्यको निरीहता र उदासिनता उदाङ्ग्गिएको आरोप लगाइएको छ ।
पत्रकार सम्मेलनमा प्रेषित प्रेस बक्तब्यमा तत्काल दोषीलाई कडा भन्दा कडा कारबाहीको माग गरिएको छ । अन्यथा संघ जस्तोसुकै कदम उठाउन बाध्य हुने बताइएको छ ।
उक्त अवसरमा मृतक श्रेष्ठका आफन्त भाइकृष्ण श्रेष्ठले प्रहरीले आफन्तलाई चित्त बुझ्दो अनुसन्धान बिना नै अपराधी सार्वजनिक गरी अनुसन्धानलाई सतही रुपले सम्पन्न गर्न खोजेकोमा आपत्ती प्रकट गरे । त्यसैगरी जिसस उपप्रमुख सरिता कुवर र सूर्यविनायक नगर प्रमुख जुना बस्नेत लगायत उपस्थितहरुले मृतक श्रेष्ठप्रति श्रद्धान्जली अर्पण गरेका थिए । पत्रकार सम्मेलनपछि संघले हत्यारालाई कारवाहीको माग गर्दै मध्यपुर थिमि शंखधरचोकस्थित छ लेन सडक अवरुद्ध गरी केहिबेर प्रदर्शन समेत गरेको थियो ।
गत मंगलवार राति बालकोटमा मारिएका ३३ वर्षीय युवक राजन श्रेष्ठ (आरपी) युवा संघका जिल्ला सदस्य रहेकाले संघले केन्द्रीय अध्यक्षकै उपस्थितिमा पत्रकार सम्मेलन गरी दबाब सृजना गरेको हो । यद्यपी, अध्यक्ष किरण पौडेलले मृतक आफ्नो कार्यकर्ता भएकै आधारमा मात्र नभई आम युवाको सुरक्षा चिन्ताले आफूहरु चिन्तित बनेको बताए ।
महानगरीय प्रहरी बृत्त थिमिका प्रहरी प्रमुख रहेका डिएसपी नरहरी रेग्मीको नेतृत्वमा अनुसन्धान अधिकृत सहितको प्रहरी टोलीले मृतक श्रेष्ठकै मिल्ने साथी बालकोट निवासी २८ वर्षीय हेमन्त श्रेष्ठ र मोरङ लेटाङ घरभई बालकोट बस्ने ३० वर्षीय प्रेम बिश्वकर्मालाई हत्या अभियोगमा पक्राउ गरेको छ । दुवैले अपराध स्वीकार गरेका प्रहरीले जनाएको छ ।