भक्तपुर, २४ मंसिर २०७८नेपाली काँग्रेसको १४ औ महाधिवेशनमा सभापति देखि सदस्य सम्म आकांक्षीहरु बीच तीब्र प्रतिष्पर्धा देखिएको छ । पदाधिकारीमा महत्वपूर्ण मानिएको सह-महामन्त्रीमा भने भक्तपुरको कौसलटार बस्दै आएकी कमला पन्तले पनि दावी पेश गरेकी छन् ।
पूर्व राज्यमन्त्री समेत रहेकी गोर्खाली नेतृ पन्तको मिजासिलो व्यवहार र सक्षम नेतृत्वका कारण उनी सह महामन्त्री बन्ने सम्भावना रहेको बताइएको छ ।
गोरखाबाट २०५१ र ५६ मा निर्वाचित सांसद पन्त दुवै संविधान सभामा सभासद समेत रहेकी थिइन् । विद्यार्थीबाट राजनीतिमा होमिएकी पन्त पद्मकन्या क्याम्पसको सभापति हुँदै ४० वर्ष देखि निरन्तर राजनीतिमा सक्रिय रहेकी छन् । उनी मात्र होइन, उनको परिवार नै पार्टी राजनीतिमा सक्रिय रहेको छ । उनका पति मधु आचार्य काँग्रेसका बौद्धिक नेता एवं निवर्तमान काभ्रे सभापति समेत हुन् । पन्तको भक्तपुर संग पनि बलियो साइनो रहेको छ । उनी भक्तपुरको कौसलटारमा बस्दै आएकी छन् ।
काँग्रेसको संसदीय दलमा सचेतक समेत रहीसकेकी पन्तले पार्टीको केन्द्रीय सदस्यको रुपमा समेत कार्य अनुभव संगालेकी छन् । महिलालाई हक अधिकार दिलाउन अग्रभागमा रही भूमिका निभाएकी पन्त राजनीतिमा नैतिकता भएकी नेतृको रुपमा समेत रहन सफल भएकी छन् । शैलजा आचार्य आदर्श समाजको सस्थापक पन्त सोही आदर्श पछ्याउँदै राजनीतिमा अघि बढिरहेकी नेतृ हुन् ।
