राष्ट्रिय मानव अधिकार आयोगले पत्रकारहरुका लागि ३ दिने तालिम शुरु गरेको छ । भक्तपुरको भक्तपुर गेस्ट हाउसमा आइतवारबाट तालिम शुरु भएको हो ।

राष्ट्रिय मानव अधिकार आयोगको बागमती प्रदेश कार्यालयले बागमती प्रदेशका पत्रकारलाई मानव अधिकार र पत्रकारिताबारे तालिम दिन शनिवार साँझ नै गेस्ट हाउसमा जम्मा पारेको थियो । आइतवार बिहानै आयोगका अध्यक्ष तप बहादुर मगरले उक्त तालिमको एक कार्यक्रमका बीच उद्घाटन गरेका छन् ।

तालिमको उद्घाटन गर्दै अध्यक्ष मगरले पत्रकारले मानव अधिकारको रक्षामा महत्वपूर्ण भूमिका निर्वाह गर्दै आएको चर्चा गर्दै मानव अधिकारको रक्षाका लागि थप संवेदनशील भएर पत्रकारिता गर्न प्रेरित गरेका थिए । समाजका विकृति,विसंगति र अपराध न्यूनीकरण हुँदा मानव अधिकारको स्वत: रक्षा हुने हुँदा पत्रकारहरुको समाचार सम्प्रेषण अपराधविरुद्ध र मानव अधिकार रक्षाको पक्षमा हुनुपर्ने उनले प्रष्ट पारे ।

कार्यक्रममा अध्यक्ष मगरले मानवअधिकारको रक्षाले नै समाजलाई सबल र सुदृढ गर्न सक्नेमा जोड दिंदै मानव अधिकार रक्षाका लागि अग्रभागमा  रहेका पत्रकारहरुको पेशागत दक्षता र क्षमता अभिवृद्धि गर्न तालिमको आयोजना गरिएको जानकारी गराए ।

कार्यक्रममा आयोगका कामु सचिव मुरारीप्रसाद खरेलले तालिमले पुनर्ताजगी दिने दावी गर्दै यसले मानव अधिकारलाई केन्द्रमा राखी पत्रकारिता गर्न सघाउने विश्वास व्यक्त गरेका थिए ।

त्यसैगरी वरिष्ठ पत्रकार प्रभुनारायण बस्नेतले मानव अधिकारलाई मजबुत गराउन पत्रकारहरूले यसबारे ज्ञान लिनुपर्ने आवश्यकता औल्याउदै पत्रकार मानव अधिकारको रक्षक भएकोले जिम्मेवारीबोधसहित समाचार सम्प्रेषण गर्नपर्ने प्रष्ट पारे ।

उक्त अवसरमा नेपाल पत्रकार महासंघ भक्तपुरका अध्यक्ष जगतकृष्ण प्रजापतिले भक्तपुरमा तालिम स्थल बनाएको प्रति आयोगलाई धन्यवाद दिंदै तालिमले पत्रकारहरुलाई थप सिर्जनशिल र क्षमतावान बनाउने विश्वास व्यक्त गरेका थिए । त्यसैगरी नेपाल पत्रकार महासंघ काठमाण्डौंका अध्यक्ष सूर्य सुवेदीले पत्रकारले सिक्न लजाउनु नहुने बताउदै सिक्नेसिकाउने प्रक्रियाले नै पेशागत दक्षता प्राप्त हुने बताए ।

आयोगका कर्मचारी लोकनाथ घिमिरेले संचालन गरेको उद्घाटन कार्यक्रममा आयोगका सहसचिव यज्ञप्रसाद अधिकारीले तालिमको महत्व र उदेश्य माथि प्रकाश पारेका थिए ।

उक्त तालिममा बागमती प्रदेशका १३ जिल्लाबाट करिव ३५ पत्रकारहरु सहभागी रहेका अधिकारीले जनाएका छन् । भक्तपुरबाट नेपाल पत्रकार महासंघ भक्तपुरका कार्यसमिति सदस्य संजीवप्रसाद दुलालको नेतृत्वमा ४ जना पत्रकार सो तालिममा सहभागी रहेका नेपाल पत्रकार महासंघ भक्तपुरका सचिव एवं सूचना अधिकारी संजीप घिमिरे शुभचिन्तकले जानकारी गराए ।