भक्तपुर, २६ पुस २०७८सूर्यविनायक – ५ सुवर्णेश्वरस्थित सुवर्णेश्वर संरक्षण मोक्षद्वारी सन्यास आश्रमको हाताभित्र नवनिर्मित सत्तल भवनको उद्घाटन गरिएको छ । आइतबार नगर प्रमुख बासुदेव थापाले उक्त सत्तल भवनको उद्घाटन गरेका हुन् । 
उद्घाटन समारोहलाई सम्बोधन गर्दै नगर प्रमुख थापाले धर्म भनेको उतीबेलाको कानुन भएको बताए । मानिसले गर्नपर्ने र गर्न नहुने नियममा बाध्ने धर्म यतिबेला पनि सान्दर्भिक नै भएको उनको भनाइ छ । सबै धर्मले मानिसलाई संस्कारी बनाउन सिकाउने हुनाले धर्म मान्नुपर्नेमा उनले जोड दिए । यसले धार्मिक सास्कृतिक इतिहास कायम हुने उनको तर्क रहेको छ ।
नगर प्रमुख थापाले अझै स्थानीय सरकारको कार्यकाल ४ महिना रहेको भन्दै यो अवधीमा अझ बिकासका काममा तिब्रता दिइने दावी गरे । ” एक दिन बाकी रहदा सम्म पनि राम्रो काम गरिरहन्छौ ।” उनले उद्घोष गरे ।
कार्यक्रममा उनले आफूलाई सबै नगरबासीको साथ रहेको जिकिर गर्दै राजनीतिमा प्रतिस्पर्धा हुने भएपनि बिकासनिर्माणमा कसैले बिरोध गर्न नहुने र सबैको ऐक्यबद्धता हुनुपर्ने बताए । 
कार्यक्रममा वडा नम्बर ५ का वडाध्यक्ष राजकुमार जोशीले सुवर्णेश्वर आफ्नो वडाको पर्यटकीय गन्तब्य समेत भएको भन्दै वडाले यसको बिकासमा सधै सहयोग गर्ने प्रतिवद्धता प्रकट गरेका थिए । 
स्थानीय समाजसेवी एवम् आश्रम संचालन समितिका अध्यक्ष मुकुन्दप्रसाद लुइँटेलको सभापतित्वमा सम्पन्न उद्घाटन कार्यक्रमको संचालन पूर्व एसएसपी समेत रहेका समितिका सचिव दमन थापाले गरेका थिए ।
उक्त अवसरमा निर्माण समितिका अध्यक्ष न्हुछेरत्न खाइतुले उक्त सत्तल निर्माणमा ६९ लाख१८ हजार २ सय१ रुपैया खर्च भएको बताए । उनले सत्तल निर्माण प्रतिवेदन समेत प्रस्तुत गरेका थिए ।
सत्तल निर्माण खर्च चन्दादाता र नगरपालिकाको सहयोग बाट प्राप्त भएको सचिव दमन थापाले जानकारी दिए ।