भक्तपुर, १५ माघ २०७८ कोभिड १९ नियन्त्रणका लागि भन्दै आदेश गरिएको यातायातमा जोरबिजोर प्रणाली बिबादित बनेपछि संसोधन गरिएको छ । जोरबिजोर प्रणाली अनुसार सवारी संचालन गर्दा सवारी साधनमा भीड बढेको र यात्रा सकसपूर्ण बनेको गुनासो बढेसंगै सरकारले सो व्यवस्थामा संसोधन गरेको हो ।
जिल्ला प्रशासन कार्यालय भक्तपुरकी प्रशासकीय अधिकृत उर्मिला खतिवडा घिमिरेले सार्वजनिक सवारीसाधनमा लागू जोरबिजोर प्रणाली हटाइएको बताइन् । शुक्रवार साँझ सिडिओ रुद्रादेवी शर्माले जारी गरेको आदेशमा सार्वजनिक सवारीसाधनमा लागू जोरबिजोर प्रणाली हटाइएको उनले जानकारी गराइन् ।
”गएराति राति १२ बजेदेखि नै लागू हुनेगरी सार्वजनिक बस,माइक्रो बस र टेम्पोमा लागू जोरबिजोर प्रणाली हटाइएको छ।” उनले भनिन् । सार्वजनिक सवारीसाधनमा लागू जोरबिजोर प्रणाली हटाइएको भएता पनि निजी सवारी साधन र ट्याक्सीमा भने यो व्यवस्था कायमै गरिएको सिडिओ शर्माद्वारा जारी आदेशमा उल्लेख गरिएको छ ।
भक्तपुर संगै काठमाडौं र ललितपुरका जिल्ला प्रशासन कार्यालयले पनि सूचना जारी गर्दै सार्वजनिक सवारीसाधनमा जोरबिजोर प्रणाली शुक्रवार मध्यरातदेखि हटाएका छन्।
शुक्रवार बसेको कोभिड(१९ संकट व्यवस्थापन समन्वय केन्द्र (सिसिएमसिसी) ले सार्वजनिक सवारीसाधनमा लागू जोरबिजोर प्रणाली हटाउन सिफारिश गरेसंगै जिल्ला प्रशासन कार्यालयले नयाँ आदेशमा सो व्यवस्था गरेको बताइएको छ ।
संक्रमण जोखिम कम गर्न भन्दै गत शुक्रबारदेखि जारी जोरबिजोर प्रणाली अव्यावहारिक भएको भन्दै व्यापक आलोचना भएको थियो।
