भक्तपुर, १५ माघ २०७८नेकपा(एमाले) भक्तपुरका अध्यक्ष बचन देउजाले कार्यकर्ता संरक्षण योजना अघि सारेका छन् । कार्यकर्ता संरक्षणका लागि आर्थिक कोष नै खडा गरी काम गर्ने उनको योजना रहेको छ ।
युवा नेता देउजा नेकपा(एमाले) भक्तपुरका निर्विरोध निर्वाचित अध्यक्ष हुन् । उनले आफ्नो जन्मदिनको अवसर पारेर शुक्रवार कार्यकर्ता संरक्षण कोषको घोषणा गरेका छन् । आफ्नो तर्फबाट कोषमा ५१ हजार रुपैयाँ जम्मा गरी उनले कार्यकर्ता संरक्षण कोष संचालन गर्ने उद्घोष गरेका पार्टीका चाँगुनारायण नगर उपाध्यक्ष जयराम बास्तोलाले बताए ।
उक्त अवसरमा पार्टीका जिल्ला इन्चार्ज सोमप्रसाद मिश्र समेत उपस्थित रहेका बताइएको छ । मिश्रले पनि कोषमा आर्थिक योगदान गर्ने प्रतिवद्धता प्रकट गरेका छन् । यद्यपी कोष खडा गर्ने नेकपा (एमाले) भक्तपुर जिल्ला कमिटिको निर्णय हो वा नेताहरुको व्यक्तिगत सोच हो भन्ने बारेमा भने स्पष्ट पारिएको छैन । सम्पूर्ण जनताको अप्ठ्यारोमा साथ् दिन प्रतिवद्ध राजनीतिक दल कार्यकर्तामुखी हुनु नहुने आफ्नो मत रहेको एमाले भक्तपुरका एक जिल्ला सदस्यले नाम उल्लेख नगर्ने सर्तमा बताएका छन् ।
जिल्ला अध्यक्ष देउजाले कोष खडा गरी रकम संकलन गरिने र त्यसबाट कार्यकर्तालाई अप्ठ्यारो पर्दा सहयोग गर्ने उदेश्य रहेको बताएका छन् । एमाले भक्तपुरको कार्यकर्ता संरक्षण कोषको उदेश्य असल भएपनि यसको प्रभावाकारिता भने कार्यविधि कस्तो हुने भन्ने विषयमा भर पर्ने एमाले कार्यकर्ताहरु बताउँछन् ।
पार्टी बिभाजन पछि कार्यकर्तालाई पार्टीप्रति आकर्षित गरिराख्न एमाले भक्तपुरले आर्थिक योजना अघि सार्नु बिचारलाई भन्दा भौतिक उत्प्रेरणालाई महत्व दिनु भएको भन्दै कतिपयले आलोचना समेत गरेका छन् । तीनै तहका निर्वाचन नजिकिदै गर्दा नेकपा(एमाले) भक्तपुरका अध्यक्ष बचन देउजाले अघि सारेको कर्पोरेट मोडलको कार्यकर्ता संरक्षण स्कीमलाई अर्थपूर्ण रुपले हेरिएको छ ।