भक्तपुर, २५ माघ २०७८नेकपा (एमाले) विभाजित हुँदा नेकपा(एस) तर्फ लागेका सूर्यविनायक-५ कटुञ्जेका २ स्थानीय नेताहरु एमालेमै फर्किएका छन् । नेकपा(एस) का कटुञ्जे अध्यक्षसहित युवा संघका एक जिल्ला सदस्यसमेत पुरानै पार्टीमा फर्किएका हुन् ।
यसरी नयाँ पार्टी परित्याग गर्नेमा नेकपा(एस) का कटुञ्जे अध्यक्ष शुव गुमान्जू र युवा संघका जिल्ला सदस्य नरेश गुमान्जू रहेका एमालेका जिल्ला सदस्य एवं वडाध्यक्ष राजकुमार जोशीले जानकारी गराए । नेता जोशीका अनुसार नेकपा(एस)परित्याग गरेका दुवै नेतालाई पुरानै जिम्मेवारीमा फर्काइएको हो ।
स्थानीय निर्वाचन नजिकिदै गर्दा सूर्यविनायक नगरपालिका वडा नम्बर ५ मा एमालेको बर्चस्व कायमै राख्न नेकपा(एस)का नेताकार्यकर्तालाई पुरानै घरमा फर्काउन एमाले नेताहरु क्रियाशील देखिएका छन् । मंगलवार गुभान्जूद्वयलाई एमालेमा भित्राउन सफल भएपछि स्थानीय नेताहरु दंग देखिएका छन् ।
नेकपा(एस)का जिल्ला अध्यक्ष श्याम बस्नेतले भने दास नै बन्छु भनेर फर्कनेहरुलाई रामराम भन्न सकिने तर काध थाप्न नसकिने प्रतिक्रिया दिएका छन् ।