काभ्रे, ७ फागुन २०७८शुक्रवार काभ्रेको धुलिखेलबाट सरकारी कर्मचारी बोकेर गुड्ने तरखर गर्दै थियो मयुर यातायातको कर्मचारी एक्सप्रेस । कार्यालयको काम सकाएर घर फर्कन आतुर देखिन्थे कर्मचारीहरु । तर, बसको सिटमा बसेर छिटो हिड्न हतारो गरिरहेका कर्मचारी एक्कासी एकएक गरी ओर्लन थाले । उनीहरु ओर्लन थालेपछि चालक अलमलमा परे । बसमा कुनै गडबडी भएर भने उनीहरु ओर्लिएका थिएनन् । उनीहरुलाई बसबाट ओर्लन उत्प्रेरित गरेको थियो काभ्रेकी सिडिओ हुमकला पाण्डेको कुचोले । सिडिओ आफै कुचो लिएर सडक सफा गर्न लागेको देखेपछि बसमा बसिसकेका कर्मचारीहरु ओर्लिए र वरपरको फोहोर टिप्न थाले ।
जिल्ला प्रशासन कार्यालय काभ्रेपलान्चोककी सिडिओ हुमकला पाण्डे संगै कर्मचारीहरुले सिडिओ कार्यालय देखि मालपोत कार्यालयसम्मको फोहोर टिपे । उक्त अवसरमा सिडिओ पाण्डेले वरपरको वातारण सफा हुँदा सकारात्मक भावना पैदा हुने र यसले सेवा प्रदायक, सेवाग्राही र स्थानीयलाई समेत राम्रो प्रभाव पार्ने भन्दै सरसफाइलाई महत्व दिनुपर्ने आवश्यकता औल्याइन् ।
सरसफाइको क्रममा बाटोमा चुरोटका ठुटा र गुट्खाका खोलहरु यत्रतत्र फालिएका पाइएपछि सिडिओ पाण्डेले सार्वजनिक स्थलमा धुम्रपान निषेध गर्न प्रहरीले कडाइ गर्नुपर्ने बताइन । बाटोमा अव्यवस्थित राखिएका निर्माण सामाग्री व्यवस्थित पार्न समेत उनले एसपी चक्रराज जोशीलाई आदेश दिइन । त्यसैगरी उनले प्रत्येक कार्यालयमा उत्पन्न हुने फोहोर व्यवस्थापनमा ध्यान दिन कार्यालय प्रमुखहरुलाई निर्देशन दिएकी थिइन् ।
उनले स्थानीय होटल र पसलबाट उत्पन्न हुने फोहोर व्यवस्थापनका लागि व्यवसायीहरुले आफ्नो व्यवसाय क्षेत्रभित्रको फोहोर अनिवार्य रुपमा संकलन गर्नुपर्ने र ग्राहकहरुका लागि डस्टबिनको व्यवस्था गर्नुपर्नेमा जोड दिइन् ।
सिडिओ पाण्डेले प्रजातन्त्र दिवसको अवसरमा शुक्रवार आकस्मिक रुपमा सरसफाइ कार्यक्रम राखिएको र पूर्व जानकारी बिना स्वत:स्फूर्तरुपमा कार्यक्रममा सरिक भएको भन्दै कर्मचारीहरुलाई धन्यवाद समेत दिइन् । उनले कम्तिमा हप्ताको एक दिन सफाई कार्यक्रम गर्न प्रत्येक कार्यालयका कर्मचारीहरुलाई आग्रह समेत गरिन् ।
कर्मचारीहरुले काममा अनेक बहानाबाजी गर्ने र काम नगर्ने भन्ने आम जनताको गुनासो हुनेगरेको भन्दै सिडिओ पाण्डेले कर्मचारीहरुले आफ्नो व्यवहारबाट आफूलाई जनताको सेवक सावित गर्न सक्नुपर्नेमा समेत जोड दिइन् ।
यसैबीच सिडिओ पाण्डेकै नेतृत्वमा शनिवार समेत सफाई कार्यक्रम सम्पन्न गरिएको सहायक सिडिओ अमरदिप सुनुवारले बताए । प्रजातन्त्र दिवसको अवसर पारेर शनिवार बिहान बनेपास्थित चण्डेश्वरी मन्दिरको सफाई गरिएको हो । सेना,प्रहरी र स्थानीय अगुवाहरुको समेत सक्रियता रहेको मन्दिर सफाई कार्यक्रममा जिल्लास्थित सुरक्षा प्रमुखहरु समेत सहभागी रहेका थिए ।
सिडिओ पाण्डेले भने सरसफाई फोटो खिच्ने कार्यक्रम नभएको प्रष्ट पारेकी छन् । सरसफाईबाट वातावरण सफाई संगै सकारात्मक तरंग पैदा हुने भन्दै उनले मनैदेखि सफाई अभियानमा जोडिनु पर्ने प्रष्ट पारिन् । प्रजातन्त्र दिवसको अवसरमा आयोजित चण्डेश्वरी मन्दिर सफाई कार्यक्रमपछि सिडिओ पाण्डेले प्रजातन्त्रमा जनता नै सर्वोपरी हुने भन्दै कसैको दवाव र प्रभावमा नपरी जनतालाई केन्द्रमा राखी सेवा प्रवाह गर्न समेत निर्देशन दिएकी छन् ।