भक्तपुर, ८ फागुन २०७८बिबादित अमेरिकी सहयोग परियोजना एमसीसीको विरोधमा सडक संघर्ष गरिरहेका भक्तपुरका युवा नेता सरराज उप्रेती प्रहरी हिरासत मुक्त भएका छन् । नियन्त्रणमा लिएको करिब ८ घण्टा पछि उनलाई मुक्त गरिएको हो ।
आइतवार विरोध प्रदर्शनका क्रममा नयाँ बानेश्वर बाट प्रहरीले उप्रेतीलाई पक्राउ गरी अनामनगरस्थित महानगरीय प्रहरी वृत्तमा पुर्याएको थियो । सडकमा ससक्त प्रदर्शनमा उत्रेका उप्रेतीलाई प्रहरीले दिउसो २ बजे नियन्त्रणमा लिएको थियो ।
उप्रेती नेकपा(माओवादी केन्द्र) को युवा संगठन वाइसिएल नेपाल भक्तपुरका जिल्ला सचिव हुन् । मार्सल आर्टका खेलाडी समेत रहेका उप्रेतीलाई प्रहरीले सार्वजनिक अपराधको मुद्दा चलाउने तयारी गरेपछि वाइसिएल नेताहरुले आफ्नो कार्यकर्तालाई झुटो मुद्दामा फसाउने षड्यन्त्र नगर्न चेतावनी दिएका थिए ।
उप्रेती रिहा भएसंगै उनलाई स्वागत गर्न वाइसिएल भक्तपुरको टोली अनामनगर पुगेको वाइसिएल भक्तपुरका संयोजक नरेश रंजीतले जानकारी दिए । उप्रेतीलाई दिउसो २ बजे नियन्त्रणमा लिएको प्रहरीले राति १०ः२० बजे रिहा गरेको उनले बताए ।
आइतवार संसदमा एमसीसी टेबल गर्न नदिन दबाबस्वरुप युवा र विद्यार्थीहरु सडकमा आन्दोलित बनेका थिए । दिनभर प्रदर्शनकारी र प्रहरीबीच दोहोरो भिडन्त हुँदा बानेश्वर क्षेत्र रणमैदान जस्तै बनेको थियो । यद्यपी, बिबाद र बिरोधका बाबजूद सरकारले संसदमा एमसीसीलाइ प्रवेश गराउन भने सफल भएको छ ।
बिरोध प्रदर्शनको क्रममा प्रहरी दमनमा परी वाइसिएल भक्तपुरका इन्चार्ज दिनेश थपलिया आक्रोश, संयोजक नरेश रंजित,सचिव सरराज उप्रेती, प्रदेश सदस्य दिपेश लामिछाने,सुष्मा श्रेष्ठ लगायत घाइते भएका छन् । अहिले उनीहरुको अवस्था सामान्य रहेको बताइएको छ ।