नेकपा(माओवादी केन्द्र) को भक्तपुर जिल्ला समन्वय समितिमा नयाँ नेतृत्व चयनको प्रयास गरिएको छ । लामो समयदेखि जिल्ला संयोजक रहँदै आएका नेता डिपी ढकालले नेतृत्व हस्तान्तरण गर्ने इच्छा देखाए पछि नयाँ नेतृत्व चयनको प्रयास गरिएको हो ।

एउटै व्यक्ति लामो समयदेखि जिल्लाको नेतृत्वमा रहँदा संगठनको गतिमा परिवर्तन नहुने भन्दै नेता ढकालले नेतृत्व हस्तान्तरण गर्न खोजेका उनी निकट श्रोतले बताएको छ । नेता ढकालसंग भक्तपुर पोस्टले यसबारे जिज्ञासा राख्दा उनले आफू जिल्लाको नेतृत्व हस्तान्तरण गर्न तयार रहेको पुष्टि गरे । नयाँ नेतृत्वको विकासका लागि आफूले जिल्ला समन्वय समिति छोड्न खोजेको उनको भनाइ छ ।

ढकालले कसलाई पद हस्तान्तरण गर्छन भन्ने यतिबेला भक्तपुर माओवादी केन्द्रमा चर्चाको विषय बनेको छ । नेता ढकालले भने यसमा आफ्नो कुनै रिजर्वेसन नभएको भन्दै जिल्लाको आवश्यकतामा बागमती प्रदेश समितिले उपयुक्त नेतृत्व चयन गर्न सक्ने जानकारी दिए ।

श्रोतका अनुसार बागमती प्रदेश समितिमा रहेका सुनिल गोठे बासु र जीवन तजबीच जिल्ला समन्वय समितिको अध्यक्षका लागि तिब्र प्रतिस्पर्धा रहेको छ । दुवै जना पुराना अनुभवी र परिपक्व नेताहरु रहेकाले एकलाई अध्यक्ष र अर्कोलाई सचिव बनाइने सम्भावना प्रवल रहेको प्रदेश समितिका एक नेताले बताए । यद्यपी दुबैजनाले अध्यक्षमा दावी गरेपछि सोको निर्णय हुन नसकेको बताइएको छ ।

नेता गोठे सहकारीकर्मी हुन् भने तज मार्सल आर्टका खेलाडी समेत हुन् । उनीहरु दुवैसंग नगरको नेतृत्व गरेको अनुभव छ । गोठेले पार्टीको भक्तपुर नगरको नेतृत्व गरेका छन् भने तजले सूर्यविनायक नगर कमिटीको नेतृत्व गरिसकेका छन् ।

गोठे र तजबीच को अध्यक्ष बन्ने भन्नेमा जिल्लाका नेताहरु विभाजित भैसकेको अवस्था भने छैन । यदि नेताहरु विभाजित भए भने त्यो पार्टीका लागि प्रतिकूल हुने बागमती प्रदेश समितिको ठहर रहेको एक प्रदेश सदस्यले जानकारी दिए । यस्तोमा नेता सुरेश न्यौपानेलाई अध्यक्ष बनाउदा दुबैले स्वीकार गर्ने अवस्था रहेपनि न्यौपानेले भने इच्छा देखाएका छैनन् । न्यौपाने नारायणकाजी श्रेष्ठ निकट नेता भएका र पछिल्लो राजनीतिक अवस्थामा उनी पार्टीप्रति असन्तुष्ट रहेकाले त्यो सम्भावना समेत कम हुँदै गएको श्रोतले जानकारी गराएको छ ।

सर्वसम्मत नेतृत्व चयन हुन नसके फेरिपनि ढकाललाई नै नेतृत्वका लागि अनुरोध गर्ने बागमती प्रदेश अध्यक्ष सरल सहयात्री पौडेलले सोंच बनाएका प्रदेश समितिका एक सदस्यले बताए ।