भक्तपुर, ११ बैशाख २०७८भक्तपुरमा पाँच दलीय गठबन्धनले प्रमुख र उपप्रमुख पदको उम्मेद्वारी दिने विषयमा सहमती गरेको छ । आइतवार जिल्लाका ३ नगरमा प्रमुख र उपप्रमुख कुन दलले पाउने भन्ने विषयमा सहमती भएको हो ।
गठबन्धनले भक्तपुरका ३ नगरको बाडफाड गर्दा ३ वटै नगर प्रमुख नेपाली काँग्रेसले पाउन सफल भएको छ । नेकपा(एकीकृत समाजवादी) ले २ नगरको उपप्रमुख पाएको छ भने नेकपा(माओवादी केन्द्र)ले १ नगरको उपप्रमुखमै चित्त बुझाएको छ । यद्यपी सहमती हुन बाँकी चाँगुनारायणमा माओवादीले उपप्रमुखको दावी गरिरहेको छ । यसरी हेर्दा गठबन्धनमा काँग्रेसको भागमै ४ वटै नगरको प्रमुख परेको छ भने माओवादी केन्द्रले २ उपप्रमुख र एकीकृत समाजवादीले २ उप प्रमुख पाएका छन् ।
भक्तपुर नगरपालिकाको प्रमुख नेपाली काँग्रेसले पाउने सहमती भएको छ भने उपप्रमुख पद नेकपा(एकीकृत समाजवादी) को भागमा परेको छ । मध्यपुर थिमि नगरपालिकाको प्रमुख पनि काँग्रेस ले पाएको छ त्यहाँको उपप्रमुख नेकपा(माओवादी केन्द्र)ले पाएको छ । त्यसैगरी सूर्यविनायक नगरपालिकामा समेत प्रमुख काँग्रेसकै पोल्टामा परेको छ भने उपप्रमुख पद एकीकृत समाजवादीलाई हात लागेको छ ।
बाडफाड हुन बाँकी चाँगुनारायण नगरपालिकाको प्रमुख नेपाली काँग्रेस र उपप्रमुख नेकपा(माओवादी केन्द्र) ले पाउने समेत श्रोतले जनाएको छ । चाँगुनारायणमा राप्रपा समेत गठबन्धनमा सहभागी हुन इच्छुक भएपछि राप्रपालाई ल्याउन अन्तिम प्रयास भैरहेको बुझिएको छ । राप्रपालाई गत उपनिर्वाचनका बेला चाँगुनारायणमा प्रमुख दिने काँग्रेसले लिखित सहमती नै गरेकोले काँग्रेस दोधारमा देखिन्छ । उपप्रमुख प्रस्ताव गरेपनि राप्रपाले मानेको छैन । राप्रपाका सहमहामन्त्री रहेका चाँगुनारायणका नेता रवीन्द्रप्रताप शाह नै उम्मेदवार बन्न खोजेकाले उनले प्रमुख बाहेकमा नमान्ने अडान यथावत राखेका छन् । शाहले भक्तपुरमा छ दलीय गठबन्धन बन्नसक्ने धारणा ३ दिन अघि सार्वजनिक गरिसकेका छन् । भक्तपुर पोस्ट संग कुरा गर्दै शाहले चाँगुनारायणमा वडाको उम्मेदवार टुंगो लागेपनि मेयर उपमेयर सोमबार मात्र टुंगो लाग्ने बताए । नेपाली काँग्रेससंग भएको अघिल्लो सहमती कायम हुने उनले विश्वास व्यक्त गरे ।
भोलि सोमबार उम्मेद्वारी दिने अन्तिम दिन भएकोले बिहान सम्म यो विषय टुंगो लाग्ने नेपाली काँग्रेसका एक जिल्ला नेताले भक्तपुर पोस्टलाई जानकारी दिए । राप्रपासमेत गठबन्धनमा सामेल भए माओवादी केन्द्रले चाँगुनारायणको उपप्रमुख दावी नगर्ने संकेत गरिसकेको उनले जानकारी दिए । माओवादी केन्द्रले हदैसम्म लचक भएर गठबन्धन अघि बढाउँन सहयोग गरिरहेको बताइन्छ । माओवादी केन्द्रका भक्तपुर जिल्ला संयोजक सुनिल बासुले भने आफूहरुले चाँगु नारायणमा उपप्रमुख नछाड्ने बताएका छन् ।