भक्तपुर, २६ बैशाख २०७९ उपत्यकाका सिडिओहरुको संयुक्त बैठक भक्तपुरमा सम्पन्न भएको छ । सोमबार जिल्ला प्रशासन कार्यालय भक्तपुरमा उपत्यकाका ३ सिडिओ सहित अन्तर जिल्ला सुरक्षा समन्वय बैठक सम्पन्न भएको हो ।
बैठकमा भक्तपुर सिडिओ रुद्रादेवी शर्मा, ललितपुर सिडिओ घनश्याम उपाध्याय र काठमाडौं सिडिओ गोविन्दप्रसाद रिजालको नेतृत्वमा जिल्लास्थित सुरक्षा निकायका प्रमुखहरु सहभागी रहेका थिए । निर्वाचन केन्द्रित सुरक्षा व्यवस्थाको जिल्लागत अवस्थाबारे बैठकमा छलफल भएको बताइएको छ । भक्तपुर सिडिओ रुद्रादेवी शर्माले निर्वाचन र शान्ति सुरक्षाको विषयमा केन्द्रीत भई बैठक बसेको पुष्टि गरेकी छन । जिल्लाहरुको शान्ति सुरक्षा, अपराध न्यूनिकरण, स्थानीय तह निर्वाचन २०७९ लाई स्वच्छ,स्वतन्त्र, निष्पक्ष, भयरहीत रुपमा सम्पन्न गर्ने उदेश्यले समन्वयका लागि बैठक बसेको सिडिओ शर्माले बताएकी छन् । निर्वाचनलाई भयरहीत वातावरणमा शान्तिपूर्ण र उल्लासमय बनाउने विषयमा आवश्यक निर्णय गरिएको समेत उनले बताइन ।
निर्वाचनमा आउनसक्ने चुनौतीहरु र त्यसको समाधानका लागि आवश्यक पूर्वतयारीको विषयमा समेत रणनीति बनाइएको श्रोतले बताएपनि सिडिओ शर्माले भने आसन्न निर्वाचनमा सुरक्षा चुनौती नरहेको र यो शान्तिपूर्ण ढंगले सम्पन्न हुने जिकिर गरेकी छन । निर्वाचनको विरुद्धमा कुनै पनि शक्ति नरहेको उनको दावी छ । सुरक्षा निकायलाई आ आफ्नो जिम्मेवारी दिएर हाइ एलर्ट रही निर्वाचनलाई शान्तिपूर्ण ढंगले सम्पन्न गर्न सकिने तीनै जिल्लाका सिडिओहरुले विस्वास व्यक्त गरेका सहभागी एक अधिकारीले बताए । उनीहरुले जिल्लामा अनावश्यक सवारी पास वितरण नगर्ने र मादक पदार्थ सेवन र विक्री वितरण निषेध गर्ने कुरालाई कडाइका साथ् लागू गर्ने निर्णय गरेका छन् भने मौन अवधिमा हुनसक्ने निर्वाचन आचार संहिता हनन र झडपको अवस्था हुन नदिन विशेष संयन्त्र परिचालनमा जोड दिएका जानकारी प्राप्त भएको छ । वैठकमा जिल्लाहरुको शान्ति सुरक्षा, अपराध न्यूनिकरण, स्थानीय तह निर्वाचन २०७९ लाई स्वच्छ,स्वतन्त्र, निष्पक्ष, भयरहीत रुपमा सम्पन्न गर्न तीन वटै जिल्लाका जिल्ला प्रशासन कार्यालय र सुरक्षा निकायबीच समन्वय गरिने निर्णय भएको समेत बताइएको छ।
