भक्तपुर, २८ बैशाख २०७९झमझम परेको झरीलाई बेवास्ता गर्दै बुधवार सिडिओ रुद्रादेवी शर्माको नेतृत्वमा एक टोलीले सूर्यविनायकका मतदान केन्द्रहरुको निरीक्षण गरेको छ । मतदानको दिन आउँन २ दिन पनि बाँकी नभएपछि त्यसको चाँजोपाँजो मिलाउन निस्केको टोलीलाई बर्खे झरीले रोक्न सकेन । 
सिडिओ शर्माको नेतृत्वमा बुधबार जिल्ला सुरक्षा समितिका पदाधिकारीहरुले मतदान केन्द्रहरुको स्थलगत निरीक्षण गरेका हुन् । उक्त अवसरमा नेपाली सेनाको इन्द्रबक्स गणका गणपती श्यामराजा बिक्रम थापा, जिल्ला प्रहरी परिसर भक्तपुरका प्रमुख शिवकुमार श्रेष्ठ, सशस्त्र प्रहरी बल नं.२२ गणका प्रमुख नरबहादुर रावत र राष्ट्रिय अनुसन्धान विभागका भक्तपुर प्रमुख टेकराज तिमल्सिना तथा पत्रकार महासंघ भक्तपुरकी उपाध्यक्ष लिला श्रेष्ठ र सचिव संजीप घिमिरे शुभचिन्तक लगायतको सहभागिता रहेको थियो ।
बुधवार उक्त टोलीले सूर्यविनायक नगरपालिका अन्तर्गत रहेका १ दर्जन मतदान स्थल र त्यहाँ रहेका मतदान केन्द्रहरुको स्थलगत निरीक्षण गरेको हो । उनीहरुले पाण्डुबजारको एजे स्कूल, कटुन्जेको आधारभूत स्कूल र वडा कार्यालय भवन, चित्रपुरको गणेश मन्दिर केन्द्र, गाम्चाको अरनिको स्कूल, तर्खाकालाको तत्कालिन दुध डेरी र वर्तमान युवा विकास तथा अध्ययन केन्द्रको भवन,विरुवाको फूलमाया भगवती मावि,सिरुटारको सोम लिंगेश्वर आधारभूत विद्यालय र तत्कालिन गाविस भवनमा स्थित मतदान स्थल र मतदान केन्द्रहरुको स्थलगत अनुगमन गरेका थिए ।
उक्त अवसरमा सिडिओ शर्माले मतदानको तयारी बारे कार्यस्थलमा खटिएका मतदान अधिकृतहरुसंग जानकारी लिएकी छन् । सिडिओ शर्माले निर्वाचन आयोगले दिएको कार्यविधि अनुसार काम गर्न र सर्वदलीय सहमति अनुरुप आवश्यक निर्णयहरु लिन सुझाव समेत दिइन । उनले अपाङ्गता भएका र जेष्ठ नागरिक मतदातालाई प्राथमिकतापूर्वक मतदानमा सहभागी गराउन समेत निर्देशन दिएकी छन । उनले बर्षाको समय भएकोले मतदाता,मतपत्र र मतपेटिका लगायत निर्वाचन सामाग्रीको सुरक्षाको उपाय अपनाउन अनिवार्य रुपले टेण्ट टाग्न निर्देशन दिएकी छन् ।
निरीक्षणका क्रममा सुरक्षा समितिका पदाधिकारीहरुले मतदाताको सुविधा, मतदानको गोपनियता र मत पेटिकाको सुरक्षा लगायतका विषयमा मतदान अधिकारीहरु तथा सुरक्षाकर्मीहरुलाई सुरक्षाको कोणबाट अपनाउनुपर्ने सावधानी सहित आवश्यक रायसल्लाह र निर्देशन समेत दिएका छन ।
सिडिओ शर्माका अनुसार सिरुटारको तत्कालिन गाविस भवन बाहेकका मतदान केन्द्रहरुको अवस्था सन्तोषजनक देखिएको छ । उनले उक्त मतदान स्थल साघुरो भएकोले सर्वदलीय सहमती गरेर नजिकैको फ़ुट्सलमा सार्न सुझाव दिंदै त्यसको लागि आफूले आवश्यक सहयोग गर्ने बताइन । बिगतमा निर्वाचन सम्पन्न भएका मतदान स्थललाई निरन्तरता दिइदा उक्त मतदान स्थलले निरन्तरता पाएको तर अर्को पटक त्यसको स्थायी बिकल्प खोजिने उनको भनाइ छ ।
जिल्लामा शान्ति सुरक्षा कायम गरिएकोले मतदानको लागि भयरहीत वातावरण बनाइएको र कसैको करकापमा नपरी स्वतन्त्र रुपले आफूले रोजेको उम्मेदवारलाई मत हाल्न सकिने उनको दावी छ । सिडिओ शर्माले कसैले मतदानमा अनुचित दबाब दिएको खण्डमा प्रहरीमा खबर गर्न समेत मतदातालाई अपिल गरेकी छन् ।
बैशाख ३० गते सम्पन्न हुने मतदानका लागि भक्तपुरमा ७७ वटा मतदान स्थलमा २ सय १९ मतदान केन्द्र तोकिएका छन् । जसमध्ये भक्तपुर नगरपालिकाका १६ मतदानस्थलमा ६२ मतदान केन्द्र, चाँगुनारायणका २१ मतदानस्थलमा ५३ मतदान केन्द्र त्यसैगरी मध्यपुर थिमि नगरपालिकाका १७ मतदानस्थलमा ४६ मतदान केन्द्र र सूर्यविनायकका २३ मतदानस्थलमा ५८ मतदान केन्द्र रहेका छन् । सुरक्षा समितिले जिल्लामा सामान्य संवेदनशील ४० र ३७ वटा संवेदनशील मतदान केन्द्र भनी पहिचान गरेको छ । सिडिओ शर्माको नेतृत्वमा सुरक्षा समितिले प्राय सबै मतदानस्थलमा पुगी सुरक्षाको आवश्यक प्रवन्ध मिलाएको बताइएको छ। शान्ति सुरक्षाको लागि जिल्लामा १ हजार ५ सय सुरक्षाकर्मी तैनाथ गरिएको सिडिओ रुद्रादेवी शर्माले जानकारी दिएकी छन् । जिल्लामा २ लाख ९० हजार मतदाता रहेका छन् ।