भक्तपुर, ४ जेठ २०७९चाँगुनारायण नगरपालिकामा नेकपा(एमाले) को नेतृत्व गुमेको छ । नगर प्रमुखमा नेपाली कांग्रेसले जीत हासिल गरेपछि एमालेले चाँगुनारायणको नेतृत्व गुमाउन बाध्य बनेको हो ।
निवर्तमान उपप्रमुख समेत रहेकी नेकपा (एमाले) की नेत्री बिना बास्तोलालाई झिनो मतको अन्तरले पराजित गर्दै नेपाली काँग्रेसका उम्मेदवार जीवन खत्रीले नगर प्रमुखमा जीत हासिल गरेका हुन् ।
खत्रीले ९ हजार ५ सय ५० मतका प्राप्त गर्दा उनका निकटतम प्रतिद्वन्द्वी एमालेकी उम्मेदवार बास्तोलाले ९ हजार १ सय ६० मत प्राप्त गरिन् । ३ सय ७० मत कम हुँदा एमाले पराजित बन्न पुग्यो ।
यस अघि नगर प्रमुखमा एमालेका सोम मिश्र निर्वाचित भएका थिए । मिश्रले ८ हजार ५ सय १२ मत पाएका थिए ।
नगर प्रमुखमा राष्ट्रिय प्रजातन्त्र पार्टीका उम्मेदवार रहेका रवीन्द्रप्रताप शाहले पनि कडा टक्कर दिएका थिए । ८ हजार ६७ मत प्राप्त गरेर उनले जीत हासिल गर्न असफल भएपनि आफ्नो र पार्टीको लोकप्रियता प्रदर्शन गर्न सफल रहे । नेमकिपाका केशवप्रसाद तिमिल्सनाले ३ हजार २ सय ६७ मत प्राप्त गरे भने नेकपा (माओवादी केन्द्र) का उम्मेदवार नरेश खड्काले ८ सय ८८ मै चित्त बुझाउनु पर्यो ।
उपप्रमुखमा भने नेकपा एमालेका रमेश बुढाथोकीले बाजी मारेका छन् । ११ हजार १ सय ७ मत प्राप्त गरेका बुढाथोकीले कांग्रेसकी सुभद्रा काफ्लेलाई पछि पार्दै जित हासिल गरेका हुन् । काफ्लेले ९ हजार ७६ मत मात्र प्राप्त गरेकी छन ।