भक्तपुर, ६ जेठ २०७९भक्तपुरकी प्रमुख जिल्ला अधिकारी रुद्रादेवी शर्माले सीमित साधन र श्रोतका बीचपनि भक्तपुरमा शान्तिपूर्ण तवरले निर्वाचन सम्पन्न गर्न सकिएको प्रति सन्तोष व्यक्त गरेकी छन । जिल्लामा भयरहीत वातावरणमा शान्तिपूर्ण तवरले निर्वाचन सम्पन्न भएको भन्दै उनले सन्तोष व्यक्त गरेकी हुन् ।
शान्ति सुरक्षाको स्थिति मजबुत भएकोले स्थानीय जनता उत्साहित भएर निर्वाचनमा सहभागी भएका प्रजिअ शर्माको भनाइ छ । भक्तपुरमा ७६ प्रतिसत मतदान हुनु यसको प्रमाण भएको उनले प्रष्ट पारिन । त्यतिमात्र होइन, जिल्लामा मतदान पछिको मत गणना पनि बिबादरहीत ढंगले सकिएको र निर्वाचन परीणामप्रति कसैको असहमती नदेखिनु ठूलो सफलता भएको दावी गरेकी छन् ।
जिल्लामा निर्वाचन परिचालन, अनुगमन र व्यवस्थापनको पक्ष बलियो पारिएकाले निर्वाचनका क्रममा अप्रिय घटना नभएको जिकिर गर्दै उनले अन्य जिल्लाको तुलनामा भक्तपुरले मतपरिणाम समेत छिटो सार्वजनिक गर्न सक्नु निर्वाचनको सुखद पक्ष रहेको बताइन । प्रजिअ शर्माले नगरपालिकाको आवश्यकता र जनताको अपेक्षा अनुरुप जनप्रतिनिधिहरुले काम गर्ने बिश्वास व्यक्त गर्दै त्यसका लागि आवश्यक सहजीकरण र समन्वयका लागि आफूहरु सदैव तत्पर रहने प्रतिवद्धता समेत प्रकट गरिन ।
