भक्तपुर, २७ जेठ २०७९अर्थमन्त्री जनार्दन शर्मा प्रभाकरले बजेटले स्वदेशी उद्योगलाई उच्च प्राथमिकता दिएको दावी गरेका छन् । मुलुक भित्रै औद्योगिकरण बिस्तार गरी आर्थिक गतिविधि अघि बढाउन खोजिएको उनले बताएका हुन् ।
शुक्रवार उद्योग संगठन मोरङ, मोरङ व्यापार संघ र नेपाल उद्योग परिसंघको प्रदेश नम्बर १ का प्रतिनिधिसंग मन्त्रालयमा भेटवार्ता गर्दै अर्थ मन्त्री शर्माले भने, ”सरकारले स्वदेशी उद्योगलाई राम्रो गर्ने भनेर बजेटमा विभिन्न व्यवस्था गरेको छ, स्वदेशी उद्योगलाई संरक्षण गरेर लैजाने नीति अनुरुप बजेट आएको हो ।” उनले भने ।
सबैसँग छलफल गरेर बजेट ल्याएकाले सबै पक्षलाई समेट्ने प्रयास भएको भन्दै उनले आम महिला वर्गलाई राहत हुनेगरी स्यानिटरी प्याड आयातमा ठूलो भन्सार छुट उपलब्ध गराएको र यस्तो छुटले स्वदेशी उद्योगलाई केही समस्या भए समाधान निकाल्न तयार रहेको पनि जानकारी
दिए । कच्चा तेल आयात गरी स्वदेशमा उद्योग चलाउने र रोजगारी सृजना गर्नेलाई बजेटले सम्बोधन गरेको उनको भनाइ छ ।सरकारको उदेश्य व्यवसायीलाई अप्ठ्यारो पार्ने नभएको भन्दै उनले व्यवसायीहरुको अप्ठ्यारो फुकाउन अर्थ मन्त्रालय सदैव तयार रहने प्रतिवद्धता समेत प्रकट गरे ।
छलफलमा उद्योग संगठन मोरङका अध्यक्ष नबिन रिजालले वायर, घिउतेल तथा स्यानीटरी उद्योगमा बजेटले पारेको प्रभावका बिषयमा छोटो प्रस्तुती दिएका थिए । उनले सरकारी नीति आउँदा आत्मसाथ गर्ने बातावरण बनाइदिन आग्रह गरेका थिए । ‘व्यवसायीलाई पनि पोलिसीले साथ दिनुस्, हामीले पनि बजेटको मुक्तकण्ठले प्रशंसा गर्ने स्थिति होस् ।’ उनले भने ।