भक्तपुर, २७ जेठ २०७९नेपाल मजदुर किसान पार्टीका सचिव एवं भक्तपुरबाट निर्वाचित संघीय सांसद प्रेम सुवालले गृह मन्त्रालयका उच्च पदस्त अधिकारीहरु माथि गम्भीर आरोप लगाएका छन् । उनले गृहका हाकिमका पत्नीहरू नै मिटरब्याज असुलीमा संलग्न रहेका एउटा आरोप लगाए भने अर्को नक्कली सुराकी बनाएर कमिशन लिइरहेको समेत आरोप लगाएका छन् ।
शुक्रबार प्रतिनिधिसभा बैठकमा विनियोजन विधेयक २०७९ अन्तर्गतको विभिन्न शीर्षकमाथि खर्च कटौतीको प्रस्ताव पेश गर्दै सांसद सुवालले यस्तो आरोप लगाएका हुन् ।
सांसद सुवालले सरकारको बजेट वक्तव्यमा मिटरब्याज नियन्त्रण गर्ने उल्लेख गरेपनि यसको कार्यान्वयन गर्ने निकायका हाकिमहरु नै बाधक देखिएको बताए ।
‘बजेट वक्तव्यमा मिटरब्याज नियन्त्रण गर्ने उल्लेख छ। तर, गृह प्रशासनका हाकिमहरुका श्रीमती, आफन्त र सल्लाहकारहरु मिटरब्याजमा संलग्न भएको, नक्कली सुराकी बनाएर कमिशन लिइरहेको र कतिपय पदाधिकारीहरुले आफन्तहरुलाई नै स्वकीय सचिव र भान्से राखेर रकम गोजीमा राखेको समाचार पनि छ । यस्ता गलत काम त कानुन हातमा लिन सक्नेहरुले गरेको देखियो नि।’ उनले भने ।