भक्तपुर, ३० जेठ २०७९काठमाडौंको त्रिभुवन अन्तर्राष्ट्रिय विमानस्थल बाट मात्र संचालन हुदै आएको हेलिकप्टर सेवा अब भक्तपुरबाट संचालन हुने भएको छ । नागरिक उड्डयन प्राधिकरणले काठमाडौंस्थित विमानस्थलको ट्राफिक जाम घटाउन हेलिकप्टर सेवालाई भक्तपुर सार्न लागेको हो । नागरिक उड्डयन प्राधिकणका महानिर्देशक प्रदिप अधिकारीले हेलिप्याड भक्तपुरमा सार्न लागिएको पुष्टि गरेका हुन् । भक्तपुर सारिएपछि अन्तर्राष्ट्रिय विमानस्थलको जमिन र आकाशमा उडान ‘होल्ड’ गर्नुपर्ने समस्या सुधार हुँदै जाने उनले विश्वास ब्यक्त गरेका छन् ।
हेलिकप्टर उडानलाई भक्तपुरको सूर्यविनायक – १० स्थित नलिञ्चोक जोरपाटीमा स्थानान्तरण गरिने तयारी रहेको छ ।
प्राधिकरणले नलिञ्चोक जोरपाटीमा हेलिप्याड निर्माणका लागि ठेक्का प्रक्रिया समेत थालिसकेको बुझिएको छ। सूनपा-१० नलिन्चोक जोरपाटीमा प्राधिकरणको आफ्नै करिब ३३ रोपनी हवाइ मैदान रहेको छ । प्राधिकरणले जनाए अनुसार नेपालमा हाल १० कम्पनीका ३३ हेलिकप्टर हवाइ सेवाका लागि दर्ता रहेका छन् । यी कम्पनीले भक्तपुर बाट सेवा दिनुपर्ने जानकारी दिइएको छ । तरपनि बिरामी बोकेका चार्टर्ड उडानले भने त्रिभुवन विमानस्थल प्रयोग गर्न पाउने बताइएको छ ।