भक्तपुर, ८ असार २०७९नेमकिपाका अध्यक्ष नारायणमान बिजुक्छें ‘रोहित’लाई पत्नीशोक परेको छ । उनकी जीवन संगिनी शोभा प्रधान बिजुक्छेंको निधन भएको हो ।
प्रधान लामो समयदेखि क्यान्सर रोगले ग्रसित थिइन् । करिब ६५ वर्षिया प्रधानको बुधवार दिउसो निधन भएको नेमकिपा श्रोतले जनाएको छ । उपचारको क्रममा उनको हरिसिद्धिस्थित क्यान्सर अस्पतालमा निधन भएको नेमकिपा भक्तपुरका जिल्ला अध्यक्ष एवं बागमती प्रदेश सांसद सुरेन्द्रराज गोसाईले पुष्टि गरेका छन् ।
रामेछाप माइती भएकी प्रधानको २०४० सालमा नेता बिजुक्छेंसंग बिबाह भएको थियो । उनका २ छोरा छन् । बुधवार भक्तपुर नगरपालिकाको नगर सभा उद्घाटन कार्यक्रममा व्यस्त अध्यक्ष बिजुक्छेंले पत्नी प्रधानलाई अन्तिम स्वासमा साथ् दिन सकेनन् । निधनको खबर लगत्तै अध्यक्ष बिजुक्छेंसहित नेमकिपाका नेताहरु यतिबेला अस्पताल पुगेका छन् । प्रधानको पार्थिव शरीरलाई शुक्रवार अन्त्येष्टि गरिने पारिवारिक श्रोतले जनाएको छ ।